संशयितांना तातडीने अटक करा

76040
लोगो : सावंतवाडी विवाहिता आत्महत्या प्रकरण
---

संशयितांना तातडीने अटक करा

ठाकरे गटाची मागणी; जिल्हा पोलिस अधीक्षकांना निवेदन

सकाळ वृत्तसेवा
सिंधुदुर्गनगरी, ता. ७ : सावंतवाडी-माठेवाडा येथील विवाहिता प्रिया पराग चव्हाण यांच्या आत्महत्येप्रकरणी देवगड येथील माजी नगराध्यक्षा प्रणाली माने आणि आर्य माने यांना तातडीने अटक करा, या मागणीसाठी ठाकरे शिवसेनेतर्फे पोलिस अधीक्षक मोहन दहिकर यांना आज निवेदन दिले. याप्रकरणी योग्य चौकशी करून संबंधितांवर कारवाई न झाल्यास आंदोलन उभारू, असा इशाराही यावेळी दिला.
निवेदनात म्हटले आहे की, सावंतवाडी-माठेवाडा, निर्माण प्लाझा येथील नवविवाहिता प्रिया चव्हाण हिचा मानसिक छळ करून तिला आत्महत्येस प्रवृत्त केल्याप्रकरणी देवगड येथील माजी नगराध्यक्षा प्रणाली माने व त्यांचा मुलगा आर्य माने यांच्यावर सावंतवाडी पोलिस ठाण्यात गुन्हा दाखल केला आहे. याप्रकरणी प्रियाचे वडील विलास तावडे यांनी सावंतवाडी पोलिस ठाण्यात तक्रार दिली आहे. प्रणाली माने या सत्ताधारी पक्षाच्या देवगड नगरपंचायतीच्या माजी नगराध्यक्षा व विद्यमान नगरसेविका आहेत. त्यामुळे या प्रकरणात राजकीय हस्तक्षेप होत असल्यानेच प्रणाली माने आणि आर्य माने यांना पोलिसांनी अद्याप अटक केली नाही. तसेच याप्रकरणात प्रणाली यांच्या पतीचीही चौकशी करावी. घटनेनंतर प्रकरण मिटविण्यासाठी माने कुटुंबीयांनी कोणा कोणाला फोन केले, त्यांचे सीडीआर तपासावेत. प्रिया चव्हाण यांना मारहाण झाल्याचीही माहिती असून, तिच्या आत्महत्येआधी घटनास्थळावर कोण कोण आले, याचा सीसीटीव्ही फुटेजद्वारे तपास करावा, अशी मागणी यावेळी केली. प्रिया चव्हाण यांच्या कुटुंबीयांना न्याय मिळवून देण्यासाठी निःपक्षपातीपणे या प्रकरणाची चौकशी करावी आणि संबंधितांना अटक करावी. याप्रकरणी योग्य चौकशी करून संबंधितांवर कारवाई न झाल्यास आंदोलन करावे लागेल, असा इशारा दिला. यावेळी माजी आमदार वैभव नाईक, परशुराम उपरकर, कणकवली विधानसभा प्रमुख सतीश सावंत, महिला जिल्हाप्रमुख नीलम पालव, सुशांत नाईक, युवासेना जिल्हाप्रमुख रवींद्र जोगल, हर्षा ठाकूर, विशाल मांजरेकर आदी उपस्थित होते.