कासार्डेतील खड्ड्यांमध्ये वृक्षारोपण

76044

कासार्डेतील खड्ड्यांमध्ये वृक्षारोपण

ग्रामस्थ आक्रमक; दुरुस्ती न केल्यास तीव्र आंदोलनाचा इशारा

सकाळ वृत्तसेवा
तळेरे, ता. ७ : कासार्डे गडमठ मार्गे फोंडा मार्गावर कासार्डे-दाबवाडी दरम्यानच्या रस्त्यावर मोठमोठे खड्डे आहेत. यामुळे वाहनचालक व पादचाऱ्यांना नाहक त्रास सहन करावा लागत आहे. सध्या मुसळधार पावसामुळे या खड्ड्यांत पाणी साचून अंदाज न आल्याने अपघाताची शक्यता निर्माण झाली आहे. याकडे प्रशासनाचे लक्ष वेधण्यासाठी स्थानिक युवक व ग्रामस्थांनी एकत्र येत या खड्ड्यांमध्ये वृक्षारोपण करण्यात आले. खड्डे तातडीने बुजविण्याची मागणी ग्रामस्थांनी यावेळी केली.
स्थानिकांनी दिलेल्या माहितीनुसार, तळेरे येथून सुरू होणारा कासार्डे गडमठमार्गे फोंडा मार्ग कासार्डे दक्षिण गावठण आंबा स्टॉप ते कासार्डे दाबवाडी भागात खड्डेच खड्डे झाले आहेत. दरवर्षी बांधकाम विभाग या मार्गाची डागडुजी करतो. मात्र, ती डागडुजी तकलादू असल्याने नेहमीच या मार्गावर खड्ड्यांचे साम्राज्य निर्माण झाले आहे. वेळोवेळी याकडे लक्ष वेधूनही डागडुजी न झाल्याने या मार्गाची दयनीय अवस्था झाली आहे. अवजड वाहतूक व संबंधित विभागाचे दुर्लक्ष यामुळे ही परिस्थिती उद्भवल्याचा आरोप ग्रामस्थांनी केला आहे. याच मार्गावर प्राथमिक आरोग्य केंद्र, शाळा, ग्रामपंचायत आणि गडमठ-फोंडा मार्ग आहे. या खड्ड्यांमुळे वाहतूक व्यवस्था विस्कळीत होत आहे. वाहनचालक आणि प्रवाशी यांना नाहक त्रास सहन करावा लागत आहे.
--------
कित्येक वर्षांपासून रस्त्याची दैना
गेले कित्येक दिवस पियाळी मार्गे रस्त्याची अवस्था बिकट आहे. नांदगाव मार्गे फोंड्याकडे जाण्याचा मार्गही कामामुळे संपूर्ण खोदलेला आहे. यामुळेही वाहनचालक आणि प्रवाशी हैराण आहेत. गडमठ मार्गे फोंडा मार्गावरील खड्डे तातडीने बुजवावेत, या मागणीकडे लक्ष वेधण्यासाठी तरुण मंडळींसह ग्रामस्थांनी खड्ड्यांत वृक्षारोपण केले. पियाळी मार्गे फोंडा रस्ता तातडीने व्हावा; अन्यथा आंदोलन छेडू, असा इशारा सामाजिक कार्यकर्ते आशुतोष मुंडले यांनी दिला आहे.