जिल्हा परिषदेत अचानक बंदोबस्त

76064

जिल्हा परिषदेत अचानक बंदोबस्त
सीईओंकडून मागणी : नेमके कारण गुलदस्त्यात; चर्चेला ऊत
सकाळ वृत्तसेवा
ओरोस, ता. ७ : जिल्हा परिषदेवर कोणताही राजकीय मोर्चा किंवा कायदा हातात घेणाऱ्या कोणत्याही संघटनेचे आंदोलन संभाव्य नसताना मुख्य कार्यकारी अधिकारी रवींद्र खेबुडकर यांनी आज अचानक जिल्हा परिषदेवर कडक बंदोबस्त लावून घेतला आहे. याबाबत खेबुडकर यांना विचारले असता ‘जिल्हा परिषदेकडे आंदोलन होणार असल्याने बंदोबस्त मागविला आहे’, असे सांगितले. यापूर्वीही जिल्हा परिषदेवर असंख्य मोर्चे आले, आंदोलने झाली. मात्र, एवढा कडक बंदोबस्त कधी लागला नव्हता. त्यामुळे नेमका बंदोबस्त कशासाठी, अशी चर्चा रंगू लागली आहे.
सिंधुदुर्ग जिल्हा परिषद अलीकडे अनेक कारणांनी चर्चेत येत आहे. विशेषतः अलीकडच्या काही महिन्यांत हा प्रकार वाढला आहे. त्यातच आज अचानक पोलिस बंदोबस्त लावला गेल्याने याबाबत उलटसुलट चर्चा सुरू आहे. विशेष म्हणजे याबाबत नेमके कारण जिल्हा परिषदेच्या एकाही अधिकारी, कर्मचाऱ्यांना माहीत नव्हते. अचानक लावलेला बंदोबस्त पाहून या अधिकारी, कर्मचाऱ्यांत जोरदार चुळबुळ सुरू झाली. प्रत्येक जण काय झाले, कोण येणार आहे, असे एकमेकांना प्रश्न विचारू लागले; परंतु नेमके कारण कोणालाच समजले नाही.
आज कर्मचारी कार्यालयात हजर होण्यापूर्वी जिल्हा परिषद इमारतीच्या प्रवेशद्वारावर पोलिस बंदोबस्त लागला होता. सुरुवातीला सर्वांना वाटले कोणी तरी राजकीय व्यक्ती येणार असेल. त्यानंतर मुख्य कार्यकारी अधिकारी खेबुडकर आपल्या दालनात आल्यानंतर त्यांच्या दालनाबाहेरसुद्धा पोलिस बंदोबस्त लावला. त्यामुळे अधिकारी, कर्मचाऱ्यांची उत्सुकता अधिकच ताणली. यावेळी त्यांनी चौकशी केली असता खेबुडकर यांना भेटण्यासाठी कोणीही आलेले नाही किंवा तसे दिवसभरात नियोजित सुध्दा नाही, असे समजल्यावर याबाबत जोरदार चर्चा होऊ लागली.
यावेळी काही जणांना वाटले काही महिन्यांपूर्वी बांधकाम विभागात निविदा तडजोडीसाठी बाऊन्सर प्रकरण घडले होते. तसा काहीतरी प्रकार होण्याची शक्यता असल्याने पोलिस बंदोबस्त मागविला असेल, असेही काहींना वाटले; परंतु तसेही काही दिवसभर घडलेले नाही. अंगणवाडी कर्मचाऱ्यांच्या नेत्या कमल परुळेकर यांनी ९ जुलैला मोर्चाचा इशारा दिला आहे. हा मोर्चा राज्यव्यापी आहे. परुळेकर यांनी यापूर्वीही अनेक मोर्चे काढलेले आहेत. आतापर्यंत शांततेत त्यांचे मोर्चे झाले आहेत. त्यांचे भाषण भडक असले तरी ते गेटच्या बाहेर असते. त्यामुळे त्यांच्या आंदोलनाचा धसका प्रशासनाने घेण्याचे कोणतेही कारण नाही. तरीही एवढा मोठा बंदोबस्त मागवून घेतला आहे.
याबाबत खेबुडकर यांना विचारले असता त्यांनी जिल्हा परिषदेच्या विरोधात अनेक आंदोलने होत असतात. त्यामुळे हा बंदोबस्त मागविला आहे, असे सांगितले. परंतु, यातून नेमके कारण स्पष्ट होत नसल्याने याबाबत उलटसुलट चर्चा सुरू आहे.

पत्रातही नाही
नेमके कारण
मुख्य कार्यकारी अधिकारी खेबुडकर यांनी पोलिस प्रशासनला पत्र पाठवित हा बंदोबस्त मागविला आहे. त्यानुसार सिंधुदुर्गनगरी पोलिस ठाण्यातून बंदोबस्त पुरविण्यात आला. बंदोबस्तासाठी पाठविलेल्या पत्रातही कोणत्या कारणासाठी बंदोबस्त पाहिजे, याबाबत स्पष्ट लिहिलेले नाही. सहायक पोलिस निरीक्षक शेखर लव्हे हे सुध्दा बंदोबस्ताला भेट देण्यासाठी आले होते. त्यांनाही कारण विचारले असता त्यांनी आपण खेबुडकर यांच्याशी चर्चा करायला आलो आहे, असे सांगत कारण देण्याचे टाळले.