‘कोकण कला’ आता विशेष दत्तक संस्था

‘कोकण कला’ आता
विशेष दत्तक संस्था
बांदा : कोकण कला व शिक्षण विकास संस्थेला विशेष दत्तक संस्था म्हणून मान्यता मिळाली आहे. यामुळे सिंधुदुर्ग जिल्ह्यातील मूल दत्तक घेऊ इच्छिणाऱ्या जोडप्यांना मोठा दिलासा मिळाला आहे. ही संस्था १३ वर्षांपासून मुलांच्या शैक्षणिक, आरोग्य, जडणघडण आणि संगोपन या विषयांवर राष्ट्रीय पातळीवर काम करत आहे. याच अनुभवामुळे आणि निःस्वार्थ कार्यामुळे संस्थेला विनाअनुदानित तत्वावर ही महत्त्वपूर्ण मान्यता मिळाली आहे. यापूर्वी सिंधुदुर्ग जिल्ह्यात अशी एकही संस्था नसल्यामुळे दत्तक घेऊ इच्छिणाऱ्या जोडप्यांना योग्य मार्गदर्शन आणि मदत मिळत नव्हती. कोकण संस्थेला मिळालेल्या मान्यतेमुळे जिल्ह्यातील इच्छुक जोडप्यांना दत्तक घेण्याची प्रक्रिया, पात्रता, आवश्यक कागदपत्रे, भावनिक तयारी आणि कायदेशीर आवश्यकतांबद्दल योग्य मार्गदर्शन मिळेल. विशेष दत्तक संस्था म्हणून मान्यता मिळविण्यासाठी जिल्हा बाल संरक्षण कक्ष, सिंधुदुर्ग यांचे विशेष सहकार्य लाभले.
....................
बांद्यात गुरुवारपासून
वजनकाटे पडताळणी
बांदा ः निरीक्षक वैधमापनशास्त्र सावंतवाडी विभागातर्फे गुरुवारी (ता. १०) ते शनिवारी (ता. १२) या कालावधीत बांदा शहर व पंचक्रोशीसाठी इलेक्ट्रॉनिक वजनकाटे मुद्रांक पडताळणी शिहिराचे बांदा व्यापारी भुवन येथे (श्री विठ्ठल मंदिर नजीक) आयोजन केले आहे. व्यापारी वर्गाने आपले इलेक्ट्रॉनिक वजनकाटे पडताळणीसाठी आणावेत, असे आवाहन करण्यात आले आहे.