वालावलला शनिवारी गुरुवर्य भजन स्पर्धा''

वालावलला शनिवारी
गुरुवर्य भजन स्पर्धा
कुडाळ ः वालावल येथील श्री देव लक्ष्मीनारायण स्थानिक सल्लागार उपसमिती व गावातील सर्व युवा भजन मंडळे तसेच आजी-माजी विद्यार्थ्यांच्या संकल्पनेतून १२ जुलैला ‘गुरुवर्य भजन स्पर्धा’ आयोजित केली आहे. या स्पर्धेत जिल्ह्यातील नामवंत सहा मंडळे सहभागी होणार आहेत. यामध्ये विठ्ठल-रुखमाई भजन मंडळ आंदुर्ले (बुवा अथर्व होडावडेकर), रामकृष्ण हरी सेवा संघ पाट पंचक्रोशी (आशिष सडेकर), श्री सद्‌गुरुनाथ प्रसादिक भजन मंडळ तुळस (सिद्धेश नाईक), श्री नवतरुण युवक भजन मंडळ माणगाव (ओमकार कुंभार), नादब्रह्म प्रसादिक भजन मंडळ कसाल (सुंदर मेस्त्री), श्री देव रवळनाथ प्रासादिक भजन मंडळ पिंगुळी (रूपेश येमकर) यांचा समावेश आहे. निवृत्त गुरुवर्यांचा सत्कार होणार आहे. उद्‍घाटनास श्री देव लक्ष्मीनारायण स्थानिक सल्लागार उपसमिती वालावल अध्यक्ष अॅड. संग्राम देसाई, जिल्हा परिषद माजी उपाध्यक्ष रणजित देसाई, सरपंच राजेश प्रभू, दयानंद चौधरी, व्यावसायिक समीर मठकर आदी उपस्थित राहणार आहेत.
....................
‘ऑप्थाल्मिक व्हॅन’चा
उद्या लोकार्पण सोहळा
सावंतवाडी ः रोटरी क्लब सावंतवाडी व रोटरी क्लब सेंट सायमन इजलॅण्ड यू.एस.ए. रोटरी डिस्ट्रिक्ट ८९२० यांच्या संयुक्त विद्यमाने उपलब्ध झालेल्या नॅशनल असोसिएशन फॉर दि ब्लाईंडच्या अत्याधुनिक आणि सुसज्ज, अशा नेत्र चिकित्सा वाहनाचा लोकार्पण सोहळा गुरुवारी (ता. १०) सकाळी १०.३० वाजता होणार आहे. नॅब सिंधुदुर्गच्या ‘ऑप्थाल्मिक व्हॅन’चा लोकार्पण सोहळा होत असून उपस्थित राहावे, असे आवाहन सचिव सोमनाथ जिगजीन्नी, अध्यक्ष अनंत उचगावकर यांनी केले आहे.