हुश्‍श...महाऑनलाईनचा सर्व्हर पुन्हा कार्यरत!

76232

हुश्‍श...महाऑनलाईनचा सर्व्हर पुन्हा कार्यरत!

पालकमंत्र्यांकडून कानउघडणी, यंत्रणेला जाग; विद्यार्थी, पालकांना दिलासा

सकाळ वृत्तसेवा
कणकवली, ता.८ : महाऑनलाईनचा सर्व्हर डाऊन झाल्याने येथील तहसील कार्यालयातील प्रतिज्ञापत्रे आणि विविध दाखले अपलोड करण्याचे काम ठप्प झाले होते. पालकमंत्री नीतेश राणे यांनी सर्वरमधील अडथळे दूर करण्याचे निर्देश दिल्‍यानंतर शासकीय यंत्रणा खडबडून जागी झाली. सर्व्हर पुन्हा सुरू झाल्‍याने विद्यार्थी आणि पालकांना दिलासा मिळाला आहे.
महाऑनलाईनचा सर्व्हर डाऊन झाल्यामुळे गेले दोन दिवस कणकवली तहसील कार्यालयातील सेतू सुविधा केंद्रामध्ये विद्यार्थ्यांची प्रतिज्ञापत्रे व विविध शासकीय दाखले अपलोडींगचे काम पूर्णतः ठप्प झाले होते. त्यामुळे विद्यार्थ्यांसह पालक आणि सर्वसामान्य नागरिक अडचणीत आले होते. या प्रश्‍नावर माजी नगरसेवक अभय राणे यांनी आज तहसीलदारांचे लक्ष वेधले. तसेच पालकमंत्री नीतेश राणे यांचे दूरध्वनीवरून लक्ष वेधले. त्‍यानंतर श्री.राणे यांनी राणे यांनी तत्काळ जिल्हाधिकारी अनिल पाटील यांच्याशी संपर्क साधून ‘‘विद्यार्थ्यांना वेळेत प्रतिज्ञापत्र मिळावे यासाठी तातडीने नियोजन करा’’ अशा स्पष्ट सूचना दिल्या. त्यानुसार जिल्हाधिकारी अनिल पाटील यांनी संचालक, महाऑनलाईन यांच्याशी थेट संपर्क साधून सिंधुदुर्ग जिल्ह्यात निर्माण झालेल्या तांत्रिक अडथळ्याची माहिती दिली. यासोबतच या समस्येमुळे नागरिकांना होणाऱ्या त्रासाची कल्पना देखील दिली.
---
पालकमंत्र्यांचे मानले आभार
दरम्यान, संबंधित विभागाने तातडीने उपाययोजना केल्यामुळे दुपारनंतर महाऑनलाईनचा सर्व्हर पुन्हा सुरळीत कार्य करू लागला असून, कणकवलीसह जिल्ह्यातील सर्व कार्यालयांतून प्रतिज्ञापत्र आणि दाखले अपलोडींगचे काम पुन्हा सुरू झाले आहे.
ही तांत्रिक समस्या वेळीच सोडविल्याबद्दल विद्यार्थ्यांनी, पालकांनी तसेच जिल्ह्यातील नागरिकांनी पालकमंत्री राणे यांचे आभार मानले. त्यांच्या तत्पर हस्तक्षेपामुळे अनेकांना दिलासा मिळाल्‍याची माहिती माजी नगरसेवक अभय राणे यांनी दिली.