गुरूकुलची मुलं पांडुरंगाच्या नामस्मरणात दंग

युनायटेड स्कूलमध्ये पायी दिंडी
चिपळूण, ता. ८ ः युनायटेड इंग्लिश स्कूलमधील गुरुकुल विभागातील विद्यार्थ्यांनी आषाढी एकादशीनिमित्त पायी दिंडी आणि सांघिक सांगीतिक भजनसेवेचा अनुभव आनंद घेतला.
आषाढी एकादशीदिवशी साप्ताहिक सुटीचा असूनही गुरुकुलातील सर्व विद्यार्थी पारंपरिक वेशभूषेत उपस्थित होते. त्यानंतर भगवान परशुरामांचे दर्शन घेऊन मार्कंडीकडील प्रवेशद्वाराने चिंचनाका नगरपालिका या मार्गाने पांडुरंगाच्या नामघोषात, टाळांच्या गजरात दिंडीत सहभागी होऊन खेंडीतील विठ्ठल मंदिरापर्यंत पोहोचले. विद्यार्थ्यांनी आषाढी एकादशीमुळे गजबजलेल्या विठ्ठल मंदिरात सुरेल भजनं सादर केली. गणपती, पांडुरंगाच्या श्लोकांनी आणि हरी जय जय राम कृष्ण हरी मंत्राने सुरू झालेल्या भजनसेवेत सुरभी चितळे हिने रूप पाहता लोचनी आणि पद्मनाभा नारायणा, प्रांजल सुरवसेने सुंदर ते ध्यान आणि घेई घेई माझे वाचे, अवंतिका जाधवने खेळ मांडिलेला वाळवंटी काठी, अनुश्री भागवतने नैवेद्य आणिला तुझं पांडुरंगा व वृंदावनी वेणू, गंधार नाईकने विठू माऊली तू तर मेघ देवळेकरने ज्ञानियांचा राजा अशी अभंग भक्तिगीते सादर केली.