माध्यमिक मुख्याध्यापक संघाचा रत्नागिरीत मोर्चा

माध्यमिक मुख्याध्यापक संघाचा मोर्चा
एक दिवसाचा संप ; शून्यशिक्षकी शाळा बंद पडण्याची शक्यता
सकाळ वृत्तसेवा
चिपळूण, ता. ८ ः शासनाच्या विविध निर्णयांमुळे मराठी व सर्व माध्यमाच्या माध्यमिक शाळा अडचणीत आल्या आहेत. १५ मार्च २०२४ च्या संचमान्यतेच्या निर्णयामुळे अनेक शाळा शून्यशिक्षकी होऊन बंद पडणार आहेत तर शेकडो शाळा एकशिक्षकी होणार आहेत. यासाठी राज्य माध्यमिक व उच्च माध्यमिक शाळा मुख्याध्यापक संघाने एक दिवसाचा राज्यव्यापी संप ११ रोजी पुकारला आहे. त्या दिवशी रत्नागिरीत जिल्हा परिषद ते जिल्हाधिकारी कार्यालय असा मोर्चा काढण्यात येणार आहे.
महामंडळाने राज्यशासनाला दिलेल्या निवेदनात विविध मागण्या केल्या आहेत. शासनाने १५ मार्च २०२४चा संचमान्यतासंदर्भातील शासननिर्णय रद्द करून २८ ऑगस्ट २०२५च्या शासन निर्णयाप्रमाणे कार्यवाही करावी, शिक्षकभरती पवित्र पोर्टलद्वारे वर्षातून दोनवेळा करावी, शिक्षकेतर कर्मचारी मान्यता देण्यात यावी, १ नोव्हेंबर २०२५ पूर्वी नियुक्त शिक्षक, शिक्षकेतर कर्मचारी यांना जुनी पेन्शन योजना लागू करावी, १४ ऑक्टोबर २०२४च्या शासननिर्णयानुसार घोषित केल्याप्रमाणे टप्पावाढ त्वरित द्यावी, या मागण्यांसाठी हा एक दिवसाचा संप असून, जिल्ह्यातील सर्व शिक्षक व शिक्षकेतर संघटनाच्या समन्वय समिती व संस्थाचालक संघटनेने या संपाला संपूर्ण पाठिंबा दिला आहे. या संपात रत्नागिरी जिल्ह्यातील मराठी व उर्दू माध्यमाच्या अनुदानित माध्यमिक शाळा व संस्थाचालकांनी सहभागी होऊन संप यशस्वी करावा, असे आवाहन जिल्हा मुख्याध्यापक संघाचे अध्यक्ष अय्युब मुल्ला, उपाध्यक्ष संजय चव्हाण, सचिव महेश पाटकर, राज्य महामंडळ कोषाध्यक्ष संदेश राऊत, राज्य सहसंपादक रमेश तरवडेकर यांनी केले आहे.