१९ वाळू गटांच्या लिलावाची तिसऱ्यांदा निविदा

पुन्हा १९ वाळूगटांच्या लिलावाची निविदा
५ लाख २८ हजार ब्रास वाळू; तीन तहसीलदारांना नोटिसा
सकाळ वृत्तसेवा
रत्नागिरी, ता. ८ : जिल्हा प्रशासनाला सर्वांत जास्त महसूल मिळवून देणाऱ्या जिल्हा खनिकर्म विभागाच्या १९ वाळूगटाच्या लिलाव प्रक्रियेला दोनवेळा प्रतिसाद मिळालेला नाही. त्यामुळे २ जुलैला तिसऱ्यांदा फेरलिलावासाठी निविदा प्रक्रिया राबवण्याची वेळ जिल्हा प्रशासनावर आली आहे. जिल्ह्यातील ड्रेझर वाळूगटात सुमारे ५ लाख २८ हजार ४२५ ब्रास वाळूसाठा असल्याचा मेरिटाईम बोर्डाचा अहवाल आहे. या गटांची लिलाव प्रक्रिया झाली तर महसूल विभागाला सुमारे ३३ कोटींच्यावर महसूल मिळणार आहे.
जिल्हा खनिकर्म विभागाने २२ ड्रेझर गटांचे लिलाव काढले आहेत. तीन वर्षांसाठीच्या या लिलाव प्रक्रियेतून जिल्हा प्रशासनाला सुमारे ३३ कोटी महसूल मिळणे अपेक्षित आहे; परंतु आतापर्यंत फक्त तीन ड्रेझर गटांचाच लिलाव झाला आहे. कमी प्रतिसाद मिळाल्याने फेरलिलाव प्रक्रिया करण्याची वेळ जिल्हा प्रशासनावर आली आहे. नव्या वाळूधोरणानुसार जिल्हा प्रशासनाने २२ ड्रेझर गटांचा लिलाव काढला आहे. यामध्ये दाभोळ १० गट, जयगड ९ तर बाणकोट ३ गटांचा समावेश आहे. पैकी दाभोळ २ गट आणि जयगड १ अशा ३ गटांचा लिलाव होऊन यातून महसूल विभागाला ४ कोटी ७७ लाखांचा महसूल मिळाला. आता १९ ड्रेझर वाळूगटांची लिलाव प्रक्रिया शिल्लक आहे. यासाठी जिल्हा प्रशासनाने एक-दोनदा नव्हे तर २ जुलैला तिसऱ्यांदा लिलावासाठी निविदा प्रक्रिया करण्यात आली. १७ जुलैपर्यंत याला मुदत आहे. त्यामुळे या प्रक्रियेला तरी प्रतिसाद मिळेल, अशी अपेक्षा आहे. १९ गटांची लिलाव प्रक्रिया झाल्यास जिल्हा प्रशासनाला सुमारे ३३ कोटींचा महसूल मिळणार आहे.
दरम्यान, जिल्ह्यात सुरू असलेल्या बेकायदेशीर वाळू उपशाला चाप लावण्यासाठी ३ तहसीलदारांना कारणे दाखवा नोटिसा बजावल्या आहेत. वारंवार या नोटिसा बजावल्यामुळे जिल्ह्यातील बेकायदेशीर वाळू उत्खननाला चाप बसला आहे, असे जिल्हाधिकारी देवेंदर सिंह यांनी सांगितले.

चौकट
ही कामे रखडली
बदलत्या वाळूधोरणामुळे जिल्ह्यातील वाळूगटांची लिलाव प्रक्रिया रखडली आहे. याचा थेट परिणाम जिल्ह्यात प्रस्तावित असलेल्या सुमारे पंधरा हजार घरकुलांवर होणार आहे. या घरकुलांना ५ ब्रास वाळू मोफत देण्याचा धोरणात्मक निर्णय जिल्हा प्रशासनाने घेतला आहे; परंतु नव्या वाळूधोरणानुसार ३० सप्टेंबर २०२५ नंतर वाळू उत्खनन सुरू होणार आहे. तोवर जिल्ह्यातील घरकुलांना दिली जाणारी ५ ब्रास मोफत वाळू मिळणार नसल्याने ही कामे रखडली जाणार आहेत.

कोट
जिल्ह्यातील २२ ड्रेझर वाळूगटांची लिलाव प्रक्रिया सुरू आहे. त्यापैकी ३ गटांचा लिलाव होऊन आम्हाला ४ कोटी ४९ लाखांचा महसूल मिळाला. उर्वरित १९ गटांचा लिलावासाठी फेरनिविदा मागवण्यात आल्या आहेत. त्यानंतर सुमारे ३३ कोटींच्या वर आम्हाला महसूल मिळेल, अशी अपेक्षा आहे.
- एम. देवेंदर सिंह, जिल्हाधिकारी रत्नागिरी