सिंधुदुर्गात डॉक्टरांचे शुक्रवारी ''कामबंद''

सिंधुदुर्गात डॉक्टरांचे
शुक्रवारी ‘काम बंद’
मेडिकल असोसिएशन : होमिओपॅथीबाबतच्‍या निर्णयावर आरोप
सकाळ वृत्तसेवा
सिंधुदुर्गनगरी, ता. ८ : होमिओपॅथी डॉक्टर्सना ‘आधुनिक वैद्यकीय व्यवसायी’ म्हणून मान्यता देत त्यांची महाराष्ट्र वैद्यकीय परिषदेमध्ये नोंदणी करण्याचा निर्णय राज्याने घेतला आहे. हा निर्णय अन्यायकारक आणि धोकादायक असल्याचा आरोप इंडियन मेडिकल असोसिएशनने केला आहे. याविरोधात मॅग्मो, इंडियन मेडिकल असोसिएशन, मेडिकल स्टुडंट, मार्ड हे सर्व वैद्यकीय अधिकारी शुक्रवारी (ता. ११) काम बंद आंदोलन करणार असल्याचा इशारा इंडियन मेडिकल असोसिएशनचे कुडाळ अध्यक्ष डॉ. संजय केसरे यांनी दिला आहे. याबाबतचे निवेदन आज आयएमए संघटना कुडाळच्या वतीने जिल्हाधिकाऱ्यांना देण्यात आले.
आयएमए संघटना कुडाळच्या वतीने जिल्हाधिकारी अनिल पाटील यांची भेट घेत निवेदन देण्यात आले. यावेळी डॉ. संजय केसरे, सचिव डॉ. अमोघ चुबे, डॉ. जयसिंह रावराणे, डॉ. प्रशांत पंडित, डॉ. प्रफुल्ल आंबेरकर, डॉ. संदीप सावंत, डॉ. अजित लिमये, डॉ. हरीश परुळेकर आदी उपस्थित होते. आयुर्वेद अभ्यासक्रमाचे शिक्षण घेणाऱ्या डॉक्टरांना ॲलोपॅथीचा सराव करण्यास केंद्राने मान्यता दिली आहे. आता होमिओपॅथी डॉक्टरांना औषधशास्‍त्र या विषयाचा एक वर्षाचा सीसीएमपी हा ब्रीज कोर्स पूर्ण केल्यावर महाराष्ट्र वैद्यकीय परिषदेकडे नोंदणी करण्यास राज्य सरकारने मान्यता दिली. मात्र, हा निर्णय सर्वसामान्यांच्या आयुष्याशी खेळणारा आहे. आपत्कालीन परिस्थितीमध्ये चुकीचे औषधोपचार, चुकीचे निदान झाल्यास रुग्णाच्या जिवाला धोका निर्माण होऊ शकतो. यामुळे डॉक्टरांची प्रतिमा मलीन होण्याची शक्यता आहे. राज्याच्या या निर्णयाविरोधात आयएमएने फेब्रुवारीमध्ये उच्च न्यायालयात याचिका दाखल केली होती. हे प्रकरण अजूनही न्यायालयात प्रलंबित असतानाही सरकारने १५ जुलैपासून हा आदेश जारी करण्याचा निर्णय कायम ठेवल्याने न्यायालयाचा अवमान झाल्याचे डॉ. केसरे यांनी सांगितले. राज्याने तातडीने हा निर्णय मागे न घेतल्यास आयएमएच्या सर्व शाखांच्या माध्यमातून राज्यव्यापी आंदोलन पुकारण्यात येईल, असा इशाराही त्यांनी दिला.

चौकट
काय आहे
सीसीएमपी कोर्स?
हा एक वर्षाचा ब्रीज कोर्स आहे. होमिओपॅथिक डॉक्टरांना ॲलोपॅथीचे ज्ञान मिळावे यासाठी तो तयार करण्यात आला आहे. हा अभ्यासक्रमातून औषधशास्‍त्राचे अगदी मर्यादित प्रमाणात मूलभूत ज्ञान मिळते. हा कोर्स कोणत्याही प्रकारे ५.५ वर्षांच्या एमबीबीएस अभ्यासक्रमाच्या समतुल्य नाही.