भात लागवड

केळ्येत चारसुत्रीने
भात लागवड
रत्नागिरी ः रत्नागिरी तालुक्यातील केळ्ये येथे ‘एक दिवस बळीराजासाठी’ उपक्रमांतर्गत शेतकरी काशिनाथ बापट यांच्या शेतामध्ये चारसूत्री पद्धतीने भातपिक लागवड प्रात्यक्षिक घेण्यात आले. तसेच सीआरए तंत्रज्ञानाद्वारे फळबाग लागवड प्रात्यक्षिकही घेण्यात आले. या वेळी जिल्हा अधिक्षक कृषी अधिकारी शिवकुमार सदाफुले, प्रकल्प संचालक आत्मा विजय बेतीवार, तालुका कृषी अधिकारी रत्नागिरी विनोद हेगडे, तंत्र अधिकारी प्रमोद पाटील, तंत्र अधिकारी काळे, मंडळ कृषी अधिकारी मासाळ आदी अधिकारी आणि कर्मचारी शेतावर उपस्थित होते.

शिवकृषी संघातर्फे
चारसूत्री भात लागवडी
सावर्डे ः गोविंदराव निकम कृषी महाविद्यालयाच्या शिवकृषी संघातर्फे ग्रामीण कृषी कार्यानुभव कार्यक्रमांतर्गत (RAWE) वैजी (ता. चिपळूण) येथील शेतकरी अशोक मोरे यांच्या शेतात चारसूत्री भात लागवडीचे प्रात्यक्षिक करण्यात आले. त्यामध्ये खताचे झाड व गिरीपुष्पाचा पाला शेतात टाकून नैसर्गिक नत्रनिर्मितीचे महत्व शेतकऱ्यांना समजावून सांगण्यात आले. त्यामुळे रासायनिक खताचा वापर टाळून जमिनीची सुपीकता टिकवून ठेवता येते याकडे लक्ष वेधण्यात आले. युरियाचा वापर न करता जमिनीत नत्राचे प्रमाण वाढवण्यासाठी खताच्या पाल्याचा वापर ही जैविक शेतीतील महत्त्वाची पायरी असल्याचे कृषी विद्यार्थ्यांनी शेतकऱ्यांना सांगितले. चारसूत्री भात लागवड ही पारंपरिक पद्धतीपेक्षा वेगळी असून, रोपं निश्चित अंतरावर लावली जातात. त्यासाठी दोरीचा वापर करून मोजमाप ठेवले जाते. त्यामुळे भाताच्या रोपांना पुरेसा प्रकाश, हवा व अन्नद्रव्ये मिळून उत्पादनात वाढ होते. ही पद्धत पाणी व खतांचा अपव्यय कमी करून उत्पादन खर्चात बचत करण्यास मदत करते, असे सांगण्यात आले.

मिस्त्री हायस्कूलमध्ये
वृक्षारोपण कार्यक्रम
रत्नागिरी ः शहरातील मिस्त्री हायस्कूल येथे वनमहोत्सव विभागामार्फत ‘एक पेड माँ के नाम’ मोहिमेंतर्गत शाळेतील इको क्लब विभागाच्यावतीने वृक्षारोपण करण्यात आले. या प्रसंगी इको क्लब विभागप्रमुख निशात राजवाडकर, शाळेच्या मुख्याध्यापिका मुनव्वर तांबोळी, पर्यवेक्षक मुश्ताक आगा, शाळेच्या ज्येष्ठ शिक्षिका संजिदा म्हसकर, कौसरजहाँ फडनाईक, शाजिया बुडये, राशिद काद्री यांच्यासह सर्व शिक्षक व विद्यार्थी उपस्थित होते. तांबोळी यांच्या हस्ते सर्वांचे स्वागत करण्यात आले. या वेळी म्हसकर यांनी मानवी जीवनातील झाडांचे महत्त्व विद्यार्थ्यांना सांगितले. त्यानंतर शालेय परिसरात आंब्याची व बदामाच्या कलमांची लागवड करण्यात आली.