आता गावागावांत मोफत नेत्रचिकित्सा

76453

आता गावागावांत मोफत नेत्रचिकित्सा

उचगावकर ः ‘सावंतवाडी रोटरी’तर्फे आज वाहनांचे लोकार्पण

सावंतवाडी, ता. ९ ः रोटरी क्लब सावंतवाडी व रोटरी क्लब सेंट सायमन इजलॅण्ड यू.एस.ए. रोटरी डिस्ट्रिक्ट यांच्या संयुक्त विद्यमाने उपलब्ध झालेल्या नॅशनल असोसिएशन फॉर दी ब्लाईंडच्या अत्याधुनिक आणि सुसज्ज नेत्र चिकित्सा वाहनाचा लोकार्पण सोहळा उद्या (ता. १०) सकाळी १०.३० वाजता होणार आहे. नॅब सिंधुदुर्गच्या या ऑप्थाल्मिक मोबाईल व्हॅनच्या लोकार्पण सोहळ्यास सर्वांनी उपस्थित राहावे, असे आवाहन अध्यक्ष अनंत उचगावकर यांनी केले आहे. सावंतवाडी येथे आयोजित पत्रकार परिषदेत ते बोलत होते.
श्री. उचगावकर म्हणाले, ‘‘रत्नागिरीसह सिंधुदुर्ग जिल्ह्यात ही व्हॅन कुठेही नव्हती. आता ती उपलब्ध झाली आहेत. यामुळे आता गावात जाऊन देखील मोफत नेत्र चिकित्सा केली जाणार आहे. या व्हॅनचा शस्त्रक्रियेसाठी ने-आण करण्यासाठी उपयोग होईल. जिल्ह्यातील प्रत्येक खेडेगावात जाऊन ही सेवा देण्याचा आमचा मानस आहे. कमीत कमी वर्षाला ३६ हजार शस्त्रक्रिया होतात. माफक दरात ही शस्त्रक्रिया करण्यात येणार आहे. ज्यांची परिस्थिती हलाखीची आहे, त्यांची मोफत शस्त्रक्रिया केली जाईल. यासाठी शासनाची कोणतीही योजना अद्याप नाही. रोटरीच्या ग्लोबल ग्रॅण्ड खाली ही ४० लाखांची व्हॅन उपलब्ध झाली आहे.’’ यावेळी नॅब सिंधुदुर्गचे सचिव सोमनाथ जिगजिन्नी, सावंतवाडी रोटरी क्लबचे अध्यक्ष ॲड. सिद्धार्थ भांबूरे, सचिव सीताराम तेली, डॉ. विनया बाड, आनंद रासम, सुबोध शेलटकर, रामदास पारकर, आबा कशाळीकर आदी उपस्थित होते.