-सहकारातील रोजगार संधीचा लाभ युवकांनी घ्यावा

सहकारातील रोजगार संधीचा लाभ घ्या
अॅड. दीपक पटवर्धन ः ‘नवनिर्माण’मध्ये सहकार दिन साजरा
सकाळ वृत्तसेवा
रत्नागिरी, ता. १० ः सहकारामध्ये स्वतःच्या पायावर उभे राहण्याची ताकद आहे. पंढरीच्या वारकऱ्याचे स्वरूप सहकारात आहे. सहकारात नफा-तोट्याला महत्व नसून, एकमेकांना सोबत घेऊन सर्वांचा उद्धार व्हावा ही संकल्पना आहे. जनसामान्यांचा आवाज बुलंद करण्याची ताकद आहे. त्यामुळे सहकाराचे महत्व जाणून घेऊन त्यामधील असलेल्या रोजगाराच्या संधीचा लाभ युवकांनी घ्यावा, असे आवाहन स्वामी स्वरूपानंद पतसंस्थेचे अध्यक्ष अॅड. दीपक पटवर्धन यांनी केले.
नवनिर्माण कनिष्ठ महाविद्यालयात सहकार दिनानिमित्त आयोजित कार्यक्रमावेळी ते बोलत होते. या वेळी नवनिर्माण शिक्षणसंस्थेचे अध्यक्ष अभिजित हेगशेट्ये, प्राचार्य डॉ. संजय गवाळे, असिस्टंट रजिस्ट्रार साहेबराव पाटील, प्रा. सुकुमार शिंदे, प्रा. सचिन टेकाळे, प्रा. प्रकाश पालांडे उपस्थित होते. सहकार चळवळ आणि सहकारी संस्था या विषयावर आयोजित करण्यात आलेल्या कार्यक्रमांमध्ये अॅड. दीपक पटवर्धन यांनी सहकाराचे महत्त्व आणि स्वरूप सांगितले. हे वर्ष आंतरराष्ट्रीय सहकार वर्ष असून, संपूर्ण जगामध्ये सहकार क्षेत्राची व्याप्ती झाली आहे. एकमेकांना सोबत घेऊन एकमेकांचा विकास करणे, हे सहकाराचे तत्त्व आहे. सहकाराच्या माध्यमातून ग्रामीण भागाचा विकास होऊ शकतो, हे पश्चिम महाराष्ट्राने दाखवून दिले आहे. विविध कार्यकारी सेवा सोसायटीच्या माध्यमातून शेतकऱ्यांना अनेक सुविधा दिल्या जात आहेत. यामुळे सहकार क्षेत्र हे अर्थव्यवस्थेचा कणा बनले आहे. सहकारात रोजगाराच्या विविध संधी आहेत. व्हीजन घेऊन सहकार क्षेत्रात काम करता येते. स्वामी स्वरूपानंद पतसंस्थेने १० हजाराच्या गुंतवणुकीपासून ६०० कोटीपर्यंतची मजल मारली आहे. अशाप्रकारे जनसामान्याचा आवाज बुलंद करण्याची ताकद सहकारामध्ये आहे, असे अॅड. पटवर्धन यांनी सांगितले. या वेळी हेगशेट्ये यांनी पश्चिम महाराष्ट्राने सहकाराच्या माध्यमातून भरभराट केली आहे. सहकारामुळे पश्चिम महाराष्ट्राचा राज्यात दबदबा आहे, अशीच चळवळ वाढणे गरजेचे असल्याचे त्यांनी सांगितले.