पोलिस ठाणे, तलाठी कार्यालयाच्या कामाला तीन वर्षांनी सुरवात

-ratchl९२.jpg-
५N७६४५१
चिपळूण ः सावर्डे येथे पोलिस ठाण्याच्या इमारत बांधकामासाठी सुरू असलेले सपाटीकरण.
------
पोलिस ठाणे, तलाठी कार्यालयाचे काम सुरू
सावर्डेत महामार्गामुळे बाधित : लोकवस्तीकडे जाणारा रस्ता आराखड्यात गायब
सकाळ वृत्तसेवा
चिपळूण, ता. ९ ः मुंबई-गोवा महामार्ग चौपदरीकरणात सावर्डे येथील पोलिस ठाणे, तलाठी कार्यालय आणि महापुरुष मंदिर बाधित झाले. या तिन्हींच्या पुनर्बांधणीसाठी सुमारे पावणेतीन कोटींचा निधी राष्ट्रीय महामार्ग विभागाने मंजूर केला; मात्र तब्बल तीन वर्षानंतर या कामांना सुरुवात झाली आहे. एकाच जागेवर ठिकाणी बांधण्यात येणाऱ्या मंदिरासह पोलिस ठाणे आणि तलाठी कार्यालयाच्या आराखड्यात लोकवस्तीकडे जाणारा रस्ता आणि मंदिराचा समावेशच केलेला नाही.
महामार्गात बाधित झालेल्या सावर्डे येथील तलाठी, पोलिस ठाणे व महापुरुष मंदिराबाबत पाठपुरावा करणारे शिवसेनेचे माजी तालुकाप्रमुख आणि या कामांसाठी पूर्वीपासून पाठपुरावा करणारे संदीप सावंत म्हणाले, सरकारी काम अन् सहा वर्षे थांब, अशी येथे अवस्था आहे. या तिन्ही कामांना निधी मिळण्यासाठी २०२३ मध्ये आरती आंदोलन केले. त्यानंतरही दोनवेळा महामार्गावर आंदोलने केली. या आंदोलनामुळे ११ ऑगस्ट २०२३ मध्ये तिन्हींसाठी २ कोटी ७१ लाख ३७ हजारांचा निधी मंजूर झाला. निधी उपलब्ध असतानाही गेल्या तीन वर्षात कामच सुरू झाले नाही. आता गेल्या आठवड्यापासून या कामांना सुरुवात झाली. राष्ट्रीय महामार्ग विभाग आणि उपविभागीय कार्यालयांमधील पत्रव्यवहारात दोन वर्षाचा कालावधी गेला. सध्या ज्या कंपनीने वाशिष्ठी येथील उड्डाणपूल पाडला त्याच कंपनीला तलाठी व पोलिस ठाण्याच्या इमारत बांधकामाचे आदेश दिले आहेत. या कार्यालयाच्या मागील बाजूस मोठी लोकवस्ती आहे. या कार्यालय परिसरातून तेथील लोकांची ये-जा असते; मात्र तलाठी व पोलिस ठाण्याच्या इमारतीच्या आराखड्यात या लोकवस्तीकडे जाण्यासाठी रस्त्याचा समावेश केलेलाच नाही शिवाय महापुरुष मंदिरासाठी १६.८५ हजार निधीची तरतूद असतानाही कामाच्या आदेशात त्याचा उल्लेख केलेला नाही. त्यामुळे या निधीवर नेमका कोण डल्ला मारतंय, असा सवाल सावंत यांनी उपस्थित केला. सुमारे २६ गुंठे जागेत कार्यालये आणि मंदिराचे काम होणार आहे. ही जागा उंचावर असल्याने तेथील उंची कमी करून रस्ता वाहतुकीस सुलभ करावा, अशी मागणीही सावंत यांनी केली. ही कामे वेगाने व्हायला हवीत; मात्र दोन वर्षे काम रखडवणाऱ्यांची चौकशी होण्यासाठी रितसर तक्रार करणार असल्याचेही सावंत यांनी सांगितले.