सिमुरगव्हानला मुलींसाठी वेदपाठशाला

सिमुरगव्हानला मुलींसाठी वेदपाठशाला
सकाळ वृत्तसेवा
पाली, ता. ९ : जगद्गुरू रामानंदाचार्य नरेंद्राचार्य यांच्या अन्य उपक्रमाप्रमाणे या मुलींसाठी वेदपाठशाला उपक्रम स्तुत्य आहे. येथे सर्व चांगली व्यवस्था आहे. यातून उत्तम वेद शिकलेल्या मुली तयार होतील, असे कौतुकाचे उद्गार भाजपचे प्रदेशाध्यक्ष रवींद्र चव्हाण यांनी आज सिमुरगव्हाण येथे काढले.
जगद्गुरू रामानंदाचार्य नरेंद्रचार्य यांच्या प्रेरणेतून सिमुरगव्हाण (ता. पाथरी ) येथे होते सुरू झालेल्या मुलींसाठीच्या वेदपाठशालेचे उद्‍घाटन आज भाजपचे प्रदेशाध्यक्ष रवींद्र चव्हाण यांच्या हस्ते झाले. त्या वेळी ते बोलत होते. चव्हाण म्हणाले, जगद्गुरू रामानंदाचार्य नरेंद्राचार्य यांचे अनेक सामाजिक उपक्रम सुरू आहेत. त्याचा हिंदू धर्म पुनर्प्रवेशाचा उपक्रम अतिशय स्तुत्य आहे. त्याचप्रमाणे देहदान, रक्तदान, अपघातग्रस्तांसाठी रुग्णवाहिका सेवा हे उपक्रम दाद देण्यासारखे आहेत. या प्रशालेतील प्रवेशासाठी १०वी, १२वी उत्तीर्ण ८३ वर विद्यार्थिनी आल्या होत्या. त्यांची परीक्षा घेऊन त्यातील ४० विद्यार्थिनींची निवड करण्यात आली आहे. आजपासून त्यांचे वर्ग सुरू झाले. मुलींची वेदपाठशाला ही कवी कुलगुरू कालिदास संस्कृत विश्वविद्यालयाच्या अंतर्गत आहे. येथे ‘हायर डिप्लोमा इन पौरोहित्य’ ही पदविका इथे प्राप्त करता येणार आहे. ती केल्यावर पौरोहित्याच्या माध्यमातून या विद्यार्थिनींना अर्थार्जनसुद्धा करता येणार आहे. मुलींना येथे मोफत शिक्षण मिळणार आहे.