वृध्द महिलेच्या डोळ्यावर यशस्वी शस्त्रक्रिया

वृद्ध महिलेची दृष्टी शस्त्रक्रियेने परत
वालावलकर रुग्णालय; १५ दिवसात डोळ्याची हालचाल
सकाळ वृत्तसेवा
सावर्डे, ता. ९ : येथील वालावलकर वैद्यकीय रुग्णालयात तपासणीसाठी आलेल्या एका ६८ वर्षांच्या महिलेला डाव्या डोळ्याने दिसत नसल्याचे दिसून आले. रुग्णालयातील वैद्यकीय अधिकाऱ्यांनी तिच्यावर अवघड शस्त्रक्रिया यशस्वरित्या पूर्ण केली. त्यानंतर पंधरा दिवसांनी त्या महिलेच्या डाव्या डोळ्याची दृष्टी परत आली.
येथील वालावलकर वैद्यकीय रुग्णालयातील आपत्कालीन विभागात एक ६८ वर्षांच्या महिला तपासणीसाठी दाखल झाली होती. त्यांना डाव्या डोळ्याने दिसत नव्हते. हा प्रश्न मागील आठवड्यापासून सुरू झाला होता. तसेच डाव्या डोळ्याची हालचालही मर्यादित होत होती. त्यांचे ‌डाव्या बाजूचे डोकेही दुखत होते. वैद्यकीय विभागातील निवासी डॉक्टरांनी त्यांची तपासणी केली आणि याबाबत रुग्णालयाच्या वैद्यकीय संचालिका डॉ. सुवर्णा पाटील यांना कळवले. रूग्णाची डॉ. राजीव केणी, डॉ. प्रतीक शहाणे आणि डॉ. सिजा यांनी तपासणी केली. नाकाचा एंडोस्कोपी करण्यात आला; मात्र त्यात काही ठोस निदान झाले नाही. अखेर नेत्रतज्ज्ञ विभागातील डॉ. सागर पाटील यांनी केलेल्या तपासणीत डाव्या डोळ्याची संपूर्ण दृष्टी गेल्याचे लक्षात आले. तपासणीत डाव्या स्पिनोइड सायनसमध्ये वाढणारा गाठीसारखा भाग दिसून आला. तो डाव्या ऑप्टिक नर्व्हवर दबाव टाकत होता. डोळ्याच्या बाहेरील भागात ऑर्बिटल सेल्युलायटिसची सुरुवातीची लक्षणे होती. त्यामुळे डोळा हलवणाऱ्या स्नायूवर परिणाम झाला होता. वैद्यकीय अधिकाऱ्यांनी तातडीने शस्त्रक्रिया करावी लागेल, असा सल्ला दिला. डॉ. लीना ठाकूर (सहाय्यक प्राध्यापक) आणि डॉ. अभिजित रोकडे यांच्या नेतृत्वाखाली अॅनेस्थेशिया टीमने संपूर्ण शस्त्रक्रिया यशस्वी केली. ही संपूर्ण उपचारप्रक्रिया महात्मा ज्योतिबा फुले आरोग्य योजनेअंतर्गत मोफत करण्यात आली. १५ दिवसांनी त्यांना डाव्या डोळ्याने दिसू लागले. त्याची हालचालही पूर्ववत झाली होती.