वसतिगृहाचा देशात नावलौकिक करा

swt106.jpg
76593
वेताळबांबर्डे ः मनोरमा चौधरी चॅरिटेबल ट्रस्टचा २४ वा स्मृती दिन विविध सामाजिक उपक्रमांनी साजरा करण्यात आला.

वसतिगृहाचा देशात नावलौकिक करा
दयानंद चौधरी ः वेताळबांबर्डेत मनोरमा चौधरींचा स्मृती दिन उत्साहात
सकाळ वृत्तसेवा
कुडाळ, ता. १० ः क्रीडा व शिक्षण क्षेत्रांत असे प्रावीण्य मिळवा की, नाग्या महादू निवासी वसतिगृहाचा डंका महाराष्ट्रासह देशामध्ये वाजला पाहिजे, असे प्रतिपादन श्रीमती मनोरमा चौधरी चॅरिटेबल ट्रस्ट वालावलचे अध्यक्ष दयानंद चौधरी यांनी वेताळबांबर्डे येथे केले. मनोरमा चौधरी चॅरिटेबल ट्रस्टच्या वतीने मनोरमा चौधरी यांचा २४ वा स्मृती दिन विविध सामाजिक उपक्रमांनी साजरा करण्यात आला.
ट्रस्टच्या वतीने कुडाळ वेताळबांबर्डे, कदमवाडी येथील नाग्या महादू निवासी वसतिगृह येथे विविध कार्यक्रमांचे आयोजन करण्यात आले. गेली २४ वर्षे श्रीमती मनोरमा चौधरी यांचा स्मृती दिन सिंधुदुर्ग जिल्ह्यामध्ये ठिकठिकाणी असणारे वृद्धाश्रम, मतिमंद शाळा, हॉस्पिटल्स अशा ठिकाणी विविध वस्तू देऊन साजरा करण्यात येतो. यावर्षी हा कार्यक्रम तालुक्यातील वेताळबांबर्डे कदमवाडी गरजू मुलांकरिता चालविण्यात येणाऱ्या नाग्या महादू निवासी वसतिगृह येथे असणाऱ्या ६० ते ६५ मुलांच्या उपस्थितीत उत्साहात साजरा करण्यात आला. ट्रस्टतर्फे वसतिगृहाकरिता धान्य व बिस्कीट पॅकेट्स देण्यात आली. स्मिता नाईक, रेश्मा साळसकर व सीमा चौधरी यांच्या हस्ते मुलांना खाऊ वाटप करण्यात आले.
यावेळी विद्यार्थ्यांना ट्रस्टचे अध्यक्ष चौधरी यांनी मार्गदर्शन केले. क्रीडा क्षेत्रांत व शिक्षण क्षेत्रात असे प्रावीण्य मिळवा की, वसतिगृहासह तालुक्याचा आणि जिल्ह्याचा डंका महाराष्ट्रासह देशामध्ये वाजला पाहिजे, असे आवाहन त्यांनी केले. ट्रस्टचे सचिव संदीप साळसकर यांनी शैक्षणिक दृष्ट्या कशी प्रगती करावी, याबाबत मार्गदर्शन केले. आभार उदय आईर यांनी मानले. या मुलांकरिता करीत असलेल्या कार्याचा आढावा घेत त्यांनी यासाठी शासनाकडून अपेक्षित मदत होत नसल्याबाबत खंत व्यक्त केली. या वसतिगृहाच्या बांधकामाकरिता डॉ. अमेय सामंत यांचे मोलाचे सहकार्य लाभल्याचे त्यांनी सांगितले. या कार्यक्रमास सीमा चौधरी, रेश्मा साळस्कर, स्मिता नाईक उपस्थित होत्या.