लोटिस्मात चौदा खंडांचा मौल्यवान ठेवा

-ratchl१०२.jpg-
२५N७६६२१
चिपळूण ः लोटिस्माला चौदा खंड भेट देताना केदार परचुरे.
---------------
‘लोकमान्य टिळक वाचनमंदिरा’त चौदा खंडांचा मौल्यवान ठेवा
ना. सी. फडके यांचे समग्र साहित्य : पुण्यातील फडके प्रतिष्ठान, साहित्यप्रेमींना संधी
सकाळ वृत्तसेवा
चिपळूण, ता. १० ः मराठी कादंबरी साहित्यात भरीव योगदान देणारे ज्येष्ठ साहित्यिक ना. सी. फडके यांचे समग्र साहित्याचे चौदा खंड लोकमान्य टिळक स्मारक वाचनमंदिर (लोटिस्मा) ला भेट स्वरूपात देण्यात आले. पुण्यातील ‘ना. सी. फडके प्रतिष्ठान’च्या वतीने गुहागर येथील केदार परचुरे यांनी सपत्नीक लोटिस्मा येथे भेट देऊन हे साहित्य संस्थेचे कार्याध्यक्ष अरुण इंगवले व सहकार्यवाह विनायक ओक यांच्याकडे सुपूर्द केले.
या प्रसंगी लोटिस्माचे संचालक अनिल धोंड्ये यांची विशेष उपस्थिती होती. ओक यांनी ग्रंथालयाच्यावतीने ग्रंथभेट स्वीकारून प्रतिष्ठानचे आभार मानले. त्यांनी सांगितले, या मौल्यवान ग्रंथसंपदेच्या आगमनामुळे वाचनालयाची ग्रंथसमृद्धी मोठ्या प्रमाणात वाढली आहे. वाचकांसाठी हा एक मोठा ठेवा ठरणार आहे. ना. सी. फडके हे मराठीतील युगप्रवर्तक कादंबरीकार, कथालेखक, लघुनिबंधकार आणि तितकेच प्रभावी साहित्य समीक्षक होते. त्यांचे साहित्य केवळ मनोरंजनापुरते मर्यादित न राहता विचारप्रवृत्त करणारे आणि भाषेच्या सौंदर्याचे दर्शन घडवणारे ठरले आहे. त्यांचे समग्र साहित्य आजच्या पिढीसाठी प्रेरणादायी आणि अभ्यासासाठी उपयुक्त आहे. लोटिस्माच्या ग्रंथालयात हे चौदा खंड लवकरच वाचनासाठी उपलब्ध होणार असून, मराठी साहित्यप्रेमींनी या संधीचा लाभ घ्यावा, असे आवाहन वाचनालय प्रशासनातर्फे करण्यात आले आहे.