सरपंच आरक्षण रद्दमुळे इच्छुकांची निराशा

सरपंच आरक्षण रद्दमुळे इच्छुक नाराज
सोमवारी नव्याने आरक्षण सोडत : गावपातळीवर पुन्हा नवी गणिते
सकाळ वृत्तसेवा
राजापूर, ता. १० ः सरपंचपदासाठी दोन महिन्यांपूर्वीच आरक्षण काढण्यात आले होते; मात्र न्यायालयाच्या मार्गदर्शक सूचनेनुसार पूर्वीचे आरक्षण राज्यशासनाने रद्द केले आहे. आता सरपंचपदाचे नव्याने आरक्षण निश्चित करण्यात येणार आहे. या नवीन बदलाने गावपातळीवरील राजकीय समीकरणे पुन्हा एकदा बदलणार आहेत. सरपंचपदाच्या आरक्षण सोडतीच्या माध्यमातून बदलाव होणाऱ्या नव्या राजकीय समीकरणाचा कौल कोणाच्या बाजूने राहणार, याकडे साऱ्‍यांचे लक्ष आहे.
दरम्यान, तालुक्यातील १०१ ग्रामपंचायतींच्या सरपंचपदाची आरक्षण सोडत सोमवारी (ता.१४) नगरपालिकेच्या नाट्यगृहामध्ये सकाळी ११ वाजता काढण्यात येणार आहे. एप्रिल महिन्यामध्ये सरपंचपदाचे आरक्षण झाले होते. त्यानुसार गावातील नेतेमंडळी निवडणुकीचे आडाखे बांधण्यात व्यस्त होते. येत्या काही महिन्यांमध्ये रखडलेल्या जिल्हा परिषद आणि पंचायत समितीच्याही निवडणुका होणार आहेत. त्यामुळे या निवडणुका डोळ्यासमोर ठेवून इच्छुकांनी सरपंचपदाची वाटणीही केली होती; मात्र हे सरपंचपदाचे आरक्षण रद्द करण्यात आले आहे. नव्याने आरक्षण सोडत होणार आहे. नव्या आरक्षण सोडतीकडे इच्छुकांसह साऱ्यांचे लक्ष आहे.