आंबोली ग्राम महसूल अधिकारी घाडीगावकरांचे सिंधुदुर्गनगरीत उपोषण

swt1034.jpg
76688
सिंधुदुर्गनगरी ः येथे उपोषणास बसलेले आंबोली ग्राम महसूल अधिकारी सुमित घाडीगावकर.

आंबोली ग्राम महसूल अधिकारी यांचे उपोषण
अन्याय होत असल्याचा घाडीगावकर यांचा आरोप; जिल्हाधिकाऱ्यांना निवेदन सादर
सकाळ वृत्तसेवा
सिंधुदुर्गनगरी, ता. १०ः वरिष्ठ अधिकाऱ्यांकडून अन्यायकारक बदली आणि हेतू पुरस्कार मानसिक व आर्थिक त्रास दिला जात असल्याचा आरोप करत तत्कालीन आंबोली ग्राम महसूल अधिकारी सुमित घाडीगावकर यांनी आज जिल्हा परिषदसमोर उपोषण सुरू केले आहे. याबाबत आपल्याला न्याय मिळावा, अशी मागणी निवेदनाद्वारे जिल्हाधिकारी यांच्याकडे केली आहे.
श्री. घाडीगावकर यांनी जिल्हाधिकारी यांना आपल्यावर झालेल्या अन्याबाबतचे निवेदन सादर करून याबाबत न्याय मागण्यासाठी आज जिल्हा परिषद प्रवेशद्वारावर उपोषण सुरू केले आहे. जिल्हाधिकारी यांना दिलेल्या निवेदनात त्यांनी म्हटले आहे की, आपल्या शासकीय कामकाजाबाबत आंबोली ग्रामस्थांच्या कोणत्याही लेखी तक्रारी नसताना एप्रिल २०२५ पासूनचे वेतन, हेतू पुरस्कर रखडून ठेवण्यात आले. तसेच महाराष्ट्र शासनाच्या आदेशानुसार वरिष्ठ कार्यालयास वारंवार अहवाल सादर करत असल्याचा रोष ठेवून जाणीवपूर्वक आपल्यावर आंबोली येथून शिरोडा येथे बदलीची कारवाई करण्यात आली आहे. शासनास व जनतेस अपेक्षित असलेले काम प्रामाणिकपणे पार पाडत असतानाही हेतू पुरस्कर तहसील व प्रांत कार्यालयाकडून आपल्यावर कारवाई करण्यात आली आहे. जाणीवपूर्वक होत असलेल्या अन्यायाविरोधात उपोषण करण्याची वेळ आली आहे. तरी याबाबत सखोल चौकशी करून कोणत्याही तक्रारी नसताना भविष्यात मनमानीपणे कारवाई होऊ नये. याबाबत महसूल प्रशासनाकडून लेखी आदेश व्हावेत व मला न्याय मिळावा, यासाठी घाडीगावकर यांनी उपोषण सुरू केले आहे.