क्राइम

रत्नागिरीत चोरटयाने
दुचाकी पळवली
रत्नागिरी ः शहरातील छत्रपतीनगर नाचणे येथे घरासमोर उभी केलेली दुचाकी चोरटयाने पळवली. शहर पोलिस ठाण्यात याची नोंद झाली आहे. ही घटना मंगळवारी (ता. ८) सकाळी पावणेआठ ते सव्वानऊच्या सुमारास छत्रपतीनगर, नाचणे येथे घडली. पोलिसांकडून मिळालेल्या माहितीनुसार, फिर्यादी संजय रमेश पावसकर (वय ५५, रा. छत्रपतीनगर, नाचणे, रत्नागिरी) यांनी दुचाकी ही त्यांनी त्यांच्या राहत्या घराच्या समोर उभी केली होती. चोरटयाने ती पळवली. या प्रकरणी संजय पावसकर यांनी शहर पोलिस ठाण्यात तक्रार दिली.

तरवळमधील वृद्धाचा
आकस्मिक मृत्यू
रत्नागिरी ः घराचे सुतारकाम करत असताना पडून वृद्ध गंभीर जखमी झाला. उपचारासाठी खासगी रुग्णालयात दाखल केले होते. उपचार सुरू असताना त्यांचा मृत्यू झाला. दत्तात्रय शंकर पांचाळ (वय ६०, रा. मायंगडेवाडी-तरवळ, रत्नागिरी) असे मृत वृद्धाचे नाव आहे. ही घटना मंगळवारी (ता. ८) रात्री घडली. पोलिसांकडून मिळालेल्या माहितीनुसार, पांचाळ हे कुंबारवाडी येथील लक्ष्मण नारायण साळवी यांच्या घराचे सुतारकाम करत असताना पडले. त्यांच्या डोक्याला व उजव्या हाताला गंभीर दुखापत झाली होती. उपचारासाठी खासगी रुग्णालयात दाखल केले होते. अधिक उपचारासाठी साळवीस्टॉप येथील रुग्णालयात दाखल केले असता तेथील वैद्यकीय अधिकाऱ्यांनी त्यांना तपासून मृत घोषित केले. ग्रामीण पोलिस ठाण्यात आकस्मिक मृत्यूची नोंद करण्यात आली आहे.

विषारी द्रव्य पिलेल्या
वृद्धाचा मृत्यू
रत्नागिरी ः विषारी द्रव्य पिलेल्या प्रौढाला उपचारासाठी जिल्हा शासकीय रुग्णालयात दाखल केले होते. अधिक उपचारासाठी सीपीआर कोल्हापूर येथे हलविण्यात आले होते. तेथे उपचार सुरू असताना त्यांचा मृत्यू झाला. संजय श्रीकांत बोंबले (वय ४५, रा. हातखंबा-रत्नागिरी) असे त्या प्रौढाचे नाव आहे. पोलिसांकडून मिळालेल्या माहितीनुसार, बोबंले यांनी कोणत्यातरी अज्ञात कारणातून विषारी द्रव्य सेवन केले. उपचारासाठी त्यांना जिल्हा रुग्णालयात दाखल केले होते. अधिक उपचारासाठी सीपीआर कोल्हापूर येथे दाखल केले होते. उपचार सुरू असताना त्यांचा मृत्यू झाला. ग्रामीण पोलिस ठाण्यात आकस्मिक मृत्यूची नोंद करण्यात आली आहे.

विद्यार्थ्याला
मोटारीची धडक
रत्नागिरी ः शहरातील पटवर्धन हायस्कूलच्या पाठीमागील मैदानातून शाळेत प्रवेश करणाऱ्या विद्यार्थ्याला मोटारीने धडक दिली. यामध्ये तो गंभीर जखमी झाला. उपचारासाठी खासगी रुग्णालयात दाखल करण्यात आले आहे. शहर पोलिस ठाण्यात अज्ञात संशयित मोटार चालकाविरुद्ध गुन्हा दाखल करण्यात आला आहे. ही घटना बुधवारी (ता. ९) सकाळी अकराच्या सुमारास घडली. पोलिसांकडून मिळालेल्या माहितीनुसार, अल्पवयीन विद्यार्थी हा सकाळी पटवर्धन हायस्कूलच्या पाठीमागील मैदानातून शाळेत जात असताना अचानक अज्ञात मोटार चालकाने निष्काळजीपणे वाहन चालवून विद्यार्थ्याला धडक दिली. या अपघातात अल्पवयीन विद्यार्थ्याच्या पायावरून मोटारीचे चाक गेले. या अपघातात अल्पवयीन विद्यार्थी गंभीर जखमी झाला. उपचारासाठी त्याला खासगी रुग्णालयात दाखल करण्यात आले आहे.