देवगडमध्ये गुरुपौर्णिमा उत्साहात

76772

देवगडमध्ये गुरुपौर्णिमा उत्साहात

विविध कार्यक्रम; दर्शनासाठी भाविकांची रिघ

सकाळ वृत्तसेवा
देवगड, ता. ११ ः तालुक्याच्या विविध भागांत आज गुरुपौर्णिमा उत्सव उत्साहात साजरा झाला. विविध ठिकाणच्या मंदिरांत भाविकांनी दर्शनासाठी गर्दी केली होती. येथील सनातन संस्थेतर्फेही जामसंडे येथे गुरुपौर्णिमा उत्सव साजरा झाला. प्रतिवर्षाप्रमाणे येथील बाजारपेठेतील श्री विठ्ठल मंदिरात वैश्य समाजातर्फे गुरुपौर्णिमेनिमित्त विविध कार्यक्रम झाले.
गुरुपौर्णिमा उत्सवानिमित्त तालुक्यातील हडपीड आणि मिठमुंबरी येथील श्री स्वामी समर्थ मंदिरात भाविकांनी दर्शनासाठी गर्दी केली होती. सायंकाळी आरतीच्या वेळीही भाविकांची उपस्थिती होती. देवगड शहरातील श्री स्वामी समर्थ मंदिरातही दर्शनासाठी भाविकांची वर्दळ सुरू होती. येथील सनातन संस्थेच्यावतीने जामसंडे येथील श्री स्वामी समर्थ मंगल कार्यालयात गुरुपौर्णिमा उत्सव साजरा करण्यात आला. यावेळी लावलेल्या स्टॉलना उपस्थितांकडून प्रतिसाद लाभला. भास्कर काजरेकर यांनी मार्गदर्शन केले. गुरुसंदेशाचे वाचन विजय पवार यांनी केले. या निमित्ताने महिलांसाठी स्वसंरक्षणाबाबत प्रात्यक्षिके दाखविण्यात आली. कराटे प्रकार, विविध प्रसंग सादर करण्यात आले. तालुक्याच्या विविध भागांतून यावेळी मंडळी उपस्थित होती. तसेच प्रतिवर्षाप्रमाणे येथील खालच्या बाजारपेठेतील श्री विठ्ठल मंदिरात उत्सव साजरा करण्यात आला. तालुका वैश्य समाजाच्या वतीने हा कार्यक्रम घेण्यात आला. यावेळी समाजाचे तालुकाध्यक्ष बिपीन कोरगावकर, व्यापारी महासंघाचे जिल्हाध्यक्ष प्रसाद पारकर, उद्योजक प्रवीण पोकळे यांच्यासह अन्य ज्ञातीबांधव उपस्थित होते. मान्यवरांच्या हस्ते गुणवंत विद्यार्थ्यांचा गौरव करण्यात आला. जक्ष पारकर यांच्या हस्ते दहीहंडी फोडून कार्यक्रमाची सांगता करण्यात आली. वैदेही भुजबळ हिने सूत्रसंचालन केले. पावसाने उसंत घेतल्याने भाविकांना दर्शन सुलभ झाले.