चिपळूण -उक्ताड येथील खड्डे भरण्यास आरंभ

उक्ताड येथील खड्डे भरण्यास प्रारंभ
दिव्यांग संघटनेच्या इशाऱ्याची दखल; नागरिकांमध्ये समाधान
सकाळ वृत्तसेवा
चिपळूण, ता. ११ ः चिपळूण-गुहागर मार्गावरील उक्ताड या रस्त्यावर मोठ्या प्रमाणात पडलेल्या खड्ड्यांमुळे रस्त्याची दुरवस्था झाली आहे. या रस्त्याची दुरूस्ती करा, अशी मागणी दिव्यांग संघटनेने केली होती. त्याची दखल घेत संबंधित विभागाकडून तत्काळ खड्डे भरण्यास सुरवात झाली आहे.
चिपळूण-गुहागर मार्गावरील उक्ताड रस्त्यावर मोठ्या प्रमाणात खड्डे पडले आहेत. या खड्ड्यामुळे रस्त्यावर वाहन चालवणेही अवघड झाले आहे. खड्ड्यामुळे रस्त्यावर दररोज लहान-मोठे अपघात घडत आहेत. या रस्त्याची तातडीने दोन दिवसात दुरूस्ती करण्याची मागणी केली होती अन्यथा नागरिकांना घेऊन रास्तारोको छेडण्यात येईल, असा इशारा दिव्यांग संघटनेचे सरचिटणीस संतोष होळकर यांनी दिला होता. त्याची दखल घेऊन राष्ट्रीय महामार्ग विभागाचे अधिकारी शाम खुणेकर यांनी रस्त्याचे काम हाती घेतले आहे. सध्या रस्त्याच्या कामाला सुरवात झाली असल्यामुळे नागरिकांमध्ये समाधानाचे वातावरण आहे.