शांत सिंधुदुर्गची ओळख कायम ठेवण्यास प्रयत्नशील

76871

शांत सिंधुदुर्गची ओळख
कायम ठेवण्यास प्रयत्नशील

नयोनी साटम; पदभार स्विकारला

सकाळ वृत्तसेवा
ओरोस, ता. ११ ः आपला सिंधुदुर्ग जिल्हा शांतताप्रिय आहे. येथील क्राईम रेशो खूपच कमी आहे. ही शांतता कायम राहण्यासाठी आपला प्रयत्न राहणार आहे. जिल्ह्यातील नागरिकांनीसुद्धा कायदा हातात घेऊ नये. अन्याय होत असल्यास पोलिसांचे सहकार्य घ्यावे, असे आवाहन सिंधुदुर्गकन्या तथा नूतन अपर पोलिस अधीक्षक नयोनी साटम यांनी जिल्ह्यातील जनतेला केले आहे.
अपर पोलिस अधीक्षक कृषिकेश रावले यांची पुणे येथे उपायुक्त म्हणून बदली झाल्यानंतर शासनाने त्यांच्या जागी साटम यांची नियुक्ती केली होती. त्यांनी काल (ता.१०) आपल्या कामाचा पदभार स्वीकारला. आज जिल्हा मुख्यालयातील पत्रकारांनी त्यांची भेट घेऊन त्यांचे स्वागत केले. यावेळी त्यांनी पत्रकारांशी गप्पा मारल्या. त्या म्हणाल्या, ‘मी या जिल्ह्याची मूळ रहिवाशी आहे. हा जिल्हा खूपच शांत आहे. थेट चंद्रपूर ते सिंधुदुर्ग आपली पदोन्नतीने बदली झाली आहे. चंद्रपूर जिल्ह्यात डीवायएसपी असताना तेथे जमीन वादाच्या शुल्लक कारणावरून खून झालेले आपण पाहिले आहेत. मात्र, सिंधुदुर्गात कायदा पाळणारी, सुशिक्षित जनता असल्याने येथील क्राईम रेशो कमी आहे. भविष्यात स्थानिक स्वराज्य संस्थांच्या निवडणुका होऊ घातल्या आहेत. या निवडणुका शांततेत पार पडण्यासाठी नागरिकांनी शांतता पाळण्यासाठी आपले प्राधान्य राहणार आहे. मी जिल्ह्याची मूळ रहिवाशी असले, तरी गणेशोत्सवास पिसेकामते येथे येत होते. कालच पदभार स्वीकारला आहे. परिणामी मला प्रथमतः जिल्हा समजून घ्यायचा आहे.’