...अन्यथा बेमुदत उपोषण छेडणार

76900

...अन्यथा बेमुदत उपोषण छेडणार

‘सीसीएमपी’ प्रश्‍नी डॉक्टरांचा इशारा, देवगडमध्ये निवेदन

सकाळ वृत्तसेवा
देवगड, ता. ११ ः ठरल्याप्रमाणे होमिओपॅथी सी. सी. एम. पी. नोंदणी सुरू न झाल्यास बुधवार (ता.१६) पासून आझाद मैदान (मुंबई) येथे बेमुदत उपोषण करणार असल्याबाबतचा इशारा महाराष्ट्र राज्य होमिओपॅथीक डॉक्टर्स कृती समितीच्यावतीने देण्यात आला आहे. मुख्यमंत्री देवेंद्र फडणवीस यांना पाठवण्यासाठी तालुक्यातील डॉक्टरांनी येथील तहसीलदारांकडे निवेदन दिले आहे. नायब तहसीलदार श्रीकृष्ण ठाकूर यांनी निवेदन स्विकारले.
डॉ. रामदास बोरकर, डॉ. नम्रता बोरकर, डॉ. मयुरेश खाडीलकर आदी डॉक्टर निवेदन देताना उपस्थित होते. निवेदनात म्हटले आहे की, ‘‘मंगळवारपासून (ता.१५) महाराष्ट्र मेडिकल कौन्सिलतर्फे सी. सी. एम. पी. नोंदणी सुरू होणार आहे. राज्याच्या २०१४ कायद्यानुसार जर मंगळवारी (ता.१५) पासून महाराष्ट्र मेडिकल कौन्सिलतर्फे होमिओपॅथी सी. सी. एम. पी. नोंदणी सुरू झाली नाही तर राज्यातील सुमारे एक लाख होमिओपॅथी डॉक्टर्स बुधवार (ता.१६) पासून महाराष्ट्र मेडिकल कौन्सिल व राज्य सरकार विरोधात तीव्र आंदोलन पुकारणार आहेत. डॉक्टर्स आझाद मैदान मुंबई येथे बुधवारपासून बेमुदत उपोषण करणार आहेत. त्यामुळे मुख्यमंत्र्यांना विनंती आहे, मंगळवारपासून महाराष्ट्र मेडिकल कौन्सिलतर्फे होमिओपॅथी सी.सी.एम.पी. नोंदणी सुरू ठेवावी. जेणेकरुन राज्यातील एक लाख होमिओपॅथी डॉक्टर्स बेमुदत उपोषण व आंदोलन करणार नाहीत. याचा तात्काळ व गांभिर्यपुर्वक विचार करून मुख्यमंत्री निर्णय घेतील, अशी अपेक्षा व्यक्त करण्यात आली आहे.