चिपळुणात ११ हजार विद्यार्थ्यांना मिळाला शाळेतच पास

चिपळुणात ११ हजार विद्यार्थ्यांना मिळाला शाळेतच पास
चिपळूण, ता. ११ ः ग्रामीण भागातून शहरात शाळा-महाविद्यालयांत शिक्षण घेणाऱ्या हजारो विद्यार्थ्यांना एसटीचे पास थेट त्यांच्या शाळेत वितरित करण्यात येत आहेत. चिपळूण तालुक्यातील ११ हजार ११५ विद्यार्थी-विद्यार्थिनींनी या योजनेचा लाभ घेतला आहे. यामध्ये दैनंदिन पास घेणारे ८ हजार ५०० विद्यार्थी व पुण्यश्लोक अहिल्याबाई होळकर योजनेंतर्गत २ हजार ६१५ विद्यार्थिनींना पास वितरित करण्यात आले आहेत.
ग्रामीण भागातील विद्यार्थ्यांना शिक्षणासाठी दररोज शहरात जावे लागते. त्‍यामुळे त्‍यांना एसटीशिवाय पर्याय नसतो. त्‍यामुळे एसटीच्या पाससाठी जवळील आगारातील केंद्रावर जाऊन तासन तास रांगेत उभे राहून पास घ्यावा लागतो किंवा गटागटाने आगारात जाऊन आगार व्यवस्थापनाकडून पास घेतले जातात. यामध्ये विद्यार्थ्यांचा बराच वेळ वाया जातो; मात्र आता विद्यार्थ्यांना पाससाठी रांगेत ताटकळत उभे राहावे लागणार नाही. त्यांच्या शाळा-महाविद्यालयांनी पुरवलेल्या यादीनुसार एसटी कर्मचाऱ्यांकडून विद्यार्थ्यांना त्यांचे एसटी पास थेट शाळेत देण्यात येत आहेत. नवीन शैक्षणिक वर्षाच्या पहिल्या सत्रातील शाळा १६ जूनपासून सुरू झाल्या आहेत. या अंतर्गत ११ हजार ११५ विद्यार्थ्यांना त्यांच्या शाळेत जाऊन एसटी कर्मचाऱ्यांनी पास वितरित केले आहेत. यांपैकी शासनाच्या पुण्यश्लोक अहिल्याबाई होळकर योजनेंतर्गत बारावीपर्यंत शिक्षण घेणाऱ्या सर्व विद्यार्थिनींना मोफत एसटी पासचे वितरण केले जाते.

कोट
जूनपासून नवे शैक्षणिक वर्ष सुरू झाले आहे. हजारो विद्यार्थी एसटी बसने शाळेला जातात. त्यांच्यासाठी विशेष शालेय फेऱ्या एसटीने सुरू केलेल्या आहेत; परंतु विविध कारणांनी काही फेऱ्या अचानक रद्द केल्या जातात. त्यामुळे विद्यार्थ्यांची सायंकाळच्या वेळी मोठी गैरसोय होते, अशा तक्रारी शालेय विद्यार्थी व त्यांच्या पालकांकडून येत आहेत. त्यामुळे ग्रामीण भागातील बसफेऱ्या रद्द करू नयेत, अशी मागणी करण्यात येत आहे.
- शशिकांत मोदी, भाजप शहरप्रमुख.