योग्य आचरणामुळे सर्वांगीण प्रगती

77048

योग्य आचरणामुळे सर्वांगीण प्रगती

डॉ. राहुल पंतवालावलकर; भंडारी हायस्कूलमध्ये गुरुपौर्णिमा उत्साहात

सकाळ वृत्तसेवा
मालवण, ता. १२ : ‘आपले शरीर हे पंचमहाभूतांप्रमाणे असून आपले शब्द, स्पर्श, वागणे आणि आहार हे आपले पहिले गुरू आहेत. यांच्यामुळेच आपल्या शरीराचा आणि एकूण व्यक्तिमत्त्वाचा विकास होतो. आपले बोलणे, वागणे व हावभावांसह आहारही योग्य हवा, तरच सर्वांगीण प्रगती साधू शकतो,’ असे प्रतिपादन आयुर्वेदिक डॉ. राहुल पंतवालावलकर यांनी येथे केले.
येथील भंडारी ए. सो. हायस्कूलमध्ये गुरुपौर्णिमा उत्सव अनोख्या पद्धतीने साजरा करण्यात आला. यावेळी विद्यार्थ्यांनी शिक्षक व पालकांचे पाद्यपूजन करून गुरुपौर्णिमेच्या शुभेच्छा दिल्या. शिक्षक व पालकांनी विद्यार्थ्यांना आशीर्वाद दिले. या कार्यक्रमाचा प्रारंभ डॉ. पंतवालावलकर यांच्या हस्ते दीपप्रज्वलन करून तसेच व्यासमुनी व सरस्वती मातेच्या प्रतिमेस पुष्पहार अर्पण करून झाला. व्यासपीठावर कार्यक्रमाचे अध्यक्ष पर्यवेक्षक आर. डी. बनसोडे, भंडारी एज्युकेशन सोसायटीचे मुख्य कार्यकारी अधिकारी वामन खोत, मुख्याध्यापक हणमंत तिवले, शिक्षक आर. बी. देसाई उपस्थित होते. वामन खोत, आर. डी. बनसोडे यांनीही मार्गदर्शन केले. विद्यार्थ्यांनी गुरू, शिक्षक, आई-वडील यांच्याप्रती आपल्या भावना मांडल्या.
आर. बी. देसाई यांनी प्रास्ताविक केले. विद्यार्थिनी त्रिवेणी लुडबेने सूत्रसंचालन केले. आर. बी. देसाई यांनी आभार मानले.
..................
आई, वडील हेच खरे मित्र-मैत्रीण
डॉ. पंतवालावलकर म्हणाले, ‘‘गुरू, शिक्षक, पालकांपेक्षा आपल्यातील चुका आपल्यालाच समजल्या पाहिजेत. आई-वडिलांना कधीही गृहित धरू नका. आपल्या अभ्यासाची आणि पालकांच्या अभ्यासाची कधीही तुलना करू नका. आपल्या जीवनात आपले आई-वडील हेच खरे जिवलग, मित्र-मैत्रीण असतात.’’