बापूसाहेब महाराजांचे कार्य अद्वितीय

77070

बापूसाहेब महाराजांचे कार्य अद्वितीय

प्रा. व्ही. जी. भास्कर; कुडाळ हायस्कूलमध्ये पुण्यतिथी

कुडाळ, ता. १२ ः ‘‘बापूसाहेब महाराज हे प्रजादक्ष राजे होते. त्यांनी शैक्षणिक आणि सामाजिक क्षेत्रात केलेल्या कार्याला कोणतीही तोड नाही. इथल्या लोकांच्या आरोग्याचे प्रश्न लक्षात घेऊन केलेल्या उपाययोजना आजही आदर्शवत आहेत,’’ असे प्रतिपादन इतिहास विभागप्रमुख प्रा. डॉ. व्ही. जी. भास्कर यांनी आज येथे केले.
सावंतवाडी संस्थानचे राजे पुण्यश्लोक बापूसाहेब महाराज यांना पुण्यतिथीनिमित्त क. म. शि. प्र. मंडळाच्या संत राऊळ महाराज महाविद्यालयामध्ये अभिवादन करण्यात आले. सर्वप्रथम पुण्यश्लोक बापूसाहेब महाराज यांच्या प्रतिमेला क. म. शि. प्र. मंडळाचे मुख्य कार्यकारी अधिकारी सुरेश चव्हाण यांच्या हस्ते पुष्पहार अर्पण करण्यात आला. द्वितीय वर्ष कला शाखेच्या गायत्री सांगोलेकर आणि आंदुर्लेकर यांनी बापूसाहेब महाराजांच्या काही आठवणी सांगितल्या. प्राचार्य डॉ. स्मिता सुरवसे यांनी महाराजांचे कार्य स्पष्ट केले. प्रा. भास्कर यांचे यावेळी व्याख्यान झाले.
प्रा. भास्कर यांनी आपल्या व्याख्यानातून पुण्यश्लोक बापूसाहेब महाराज यांच्या अनेक प्रजाहित पैलूंवर प्रकाश टाकला. बापूसाहेब महाराज एक उत्कृष्ट न्यायाधीश होते, या डॉ. बाबासाहेब आंबेडकरांच्या उद्‌गारांची आठवण त्यांनी करून दिली. बापूसाहेब महाराजांच्या ऐतिहासिक भेटीमध्ये डॉ. बाबासाहेब आंबेडकर, महात्मा गांधी, कोकणचे गांधी आप्पासाहेब पटवर्धन या महनीय व्यक्तिमत्त्वांचा संदर्भ कसा येतो, ते सांगितले. बापूसाहेबांनी चळवळीमध्ये आणि मिठाच्या सत्याग्रहामधील जखमी झालेल्या सत्याग्रहींना उपचारांसाठी मदत केली होती. ब्रिटिशांचे राज्य सुरू असतानाही स्वातंत्र्य चळवळीत महाराजांचे योगदान होते, असे सांगत काही प्रसंगांची डॉ. भास्कर यांनी मांडणी केली. महाराजांच्या नंतर हेच कार्य त्यांच्या पत्नी राजमाता पार्वतीबाई देवी, शिवरामराजे यांनी पुढे सुरू ठेवले, यावर त्यांनी भाष्य केले. इतिहास विभाग, प्रथम वर्ष कला शाखेच्या विद्यार्थिनींनी आयोजनात सहभाग घेतला.