स्वतःमधील कौशल्ये विकसित करा

77214

स्वतःमधील कौशल्ये विकसित करा

फादर मिल्टन मॉन्टेरिओ; बांदा दिव्यज्योती प्रशालेत पदवीदान

सकाळ वृत्तसेवा
बांदा, ता. १३ ः तुमच्यातील असलेल्या नेतृत्वगुणांमुळे, कौशल्यामुळे तुम्हाला गटाचे नेतृत्व करण्याची संधी मिळाली आहे. ही मोठी जबाबदारी पारदर्शकपणे पार पाडा. तुमच्या कार्यकर्तृत्वातून इतरांनी तुमचं नेतृत्व स्वतःहून स्वीकारू द्या. प्रत्येकाकडे काही कौशल्य आहेत, ती कौशल्ये विकसित करा, असे प्रतिपादन फादर मिल्टन मॉन्टेरिओ यांनी येथे केले.
येथील दिवज्योती इंग्लिश मीडियम प्रशालेच्या पदवीदान समारंभात ते प्रमुख पाहुणे म्हणून बोलत होते. प्रशालेच्या सभागृहात विद्यार्थ्यांचा पदवीदान कार्यक्रम सोहळा मोठ्या उत्साहात झाला. व्यासपीठावर डायसिसचे सदस्य तसेच प्रिस्ट कौन्सिलचे सदस्य फादर मिल्टन मॉन्टेरिओ, प्रशालेचे मुख्याध्यापक फादर रॉबिन, व्यवस्थापक फादर लिजो आदी उपस्थित होते. विद्यार्थ्यांनी विविध गुणदर्शन पर कार्यक्रम सादर केले. प्रमुख पाहुण्यांच्या हस्ते २०२५-२६ या शैक्षणिक वर्षाच्या ‘फेलिसिया’ या लोगोचे अनावरण करण्यात आले. प्रशालेच्या कार्यकारणीवर निवड झालेल्या विद्यार्थ्यांना बॅचेस देऊन मान्यवरांच्या हस्ते गौरविले. तसेच दहावी परीक्षेतील प्रशालेतून प्रथम तीन क्रमांक आलेल्या क्लिंटन फर्नांडिस, वेदिका माने, डेरन फर्नांडिस, वैष्णवी यांचा मान्यवरांच्या हस्ते गौरव करण्यात आला. शिष्यवृत्ती परीक्षेत यश प्राप्त करून ग्रामीण सर्वसाधारण विभागातून शिष्यवृत्तीधारक म्हणून निवड झालेल्या जिल्ह्यातून प्रथम आलेल्या दुर्वा नाटेकर (पाचवी) तसेच सिंधुदुर्ग जिल्ह्यातून चौथी आलेल्या मृदुला सावंत (इयत्ता आठवी) या विद्यार्थ्यांना मान्यवरांच्या हस्ते गौरविण्यात आले. प्रशालेच्या विद्यार्थिनी साईशा केसरकर, गार्गी मोटे यांनी सूत्रसंचालन केले. प्रशालेच्या शिक्षिका अन्सा फर्नांडिस यांनी प्रास्ताविक केले. मृदुला सावंत हिने आभार मानले.