वेंगुर्ले येथे १८ ला नाट्यगीत गायन स्पर्धा

77239

वेंगुर्ले येथे १८ ला नाट्यगीत गायन स्पर्धा

सचिन वालावलकर; केसरकरांच्या वाढदिनानिमित्त आयोजन

वेंगुर्ले, ता. १३ : मराठी रंगभूमीला संगीत नाटकाची समृद्ध परंपरा आहे. मात्र, काळाच्या ओघात लोकरंजनातून समाज प्रबोधन करणारी आणि अनेक गायक आणि अभिनेत्यांना प्रोत्साहन देणारे संगीत नाटक मागे पडत गेले. यावर्षी आमदार दीपक केसरकर यांच्या वाढदिवसाला संगीत नाटकाला ऊर्जितावस्था यावी, या उद्देशाने ‘नाट्यदीप’ या शीर्षकाखाली सवेश नाट्यगीत गायन स्पर्धा आयोजित करण्यात येत आहे, अशी माहिती स्पर्धेचे संयोजक सचिन वालावलकर यांनी दिली.
येथील शिवसेना कार्यालयात पत्रकार परिषद घेण्यात आली. यावेळी श्री. वालावलकर यांनी माहिती दिली. शिवसेना तालुकाप्रमुख नितीन मांजरेकर, शहरप्रमुख उमेश येरम, कोस्टल तालुकाप्रमुख काशिनाथ नार्वेकर, उपजिल्हाप्रमुख तथा समर्पण फाउंडेशनचे अध्यक्ष सुहास कोळसुलकर, सचिन वालावलकर मित्रमंडळाचे अध्यक्ष संतोष परब आदी उपस्थित होते.
श्री. वालावलकर म्हणाले, ‘‘नाट्यगीते ही मनामनांत आनंदाची, भावनेची आणि सांस्कृतिक ऊर्जेची ज्योत पेटविणार आहेत. म्हणूनच कला, संस्कृती आणि प्रेरणेच्या प्रकाशासाठी ही नाट्यदीप सवेष नाट्यगीत गायन स्पर्धा आयोजित केली आहे. केसरकरांच्या वाढदिनी म्हणजेच १८ ला सायंकाळी ४ वाजता नाट्यगीत कार्यक्रमास प्रारंभ होईल. ‘सादरीकरण नव्हे साक्षात्कार’ या उक्तीखाली होणारी ही स्पर्धा सर्व वयोगटांसाठी कोणत्याही भागातील गायक कलाकारांसाठी खुली आहे. वेंगुर्ल्यातील प्रसिद्ध मधुसूदन कालेलकर सभागृहात स्पर्धा होणार आहे. प्रथम विजेत्यास रोख रुपये ७ हजार, द्वितीय ५ हजार, तृतीय ३ हजार, उत्तेजनार्थ प्रथम क्रमांकास २ हजार व द्वितीय १ हजार व पाचही विजेत्यांना स्मृतिचिन्ह व सहभागींना प्रमाणपत्र देण्यात येणार आहे. प्रेक्षक पसंती, सर्वोत्कृष्ट वेशभूषा, सर्वोत्कृष्ट अभिनय, सर्वोत्कृष्ट गायन व सर्वोत्कृष्ट रंगमंचीय हालचाली यासाठी विशेष प्रोत्साहनपर पारितोषिके देण्यात येणार आहेत.’’
शाश्वत सेवा बहुउद्देशीय संस्था सिंधुदुर्ग व समर्पण फाउंडेशन सिंधुदुर्ग यांनी या स्पर्धेचे संयोजन केले आहे. सचिन वालावलकर मित्रमंडळ आणि शिवसेना वेंगुर्ला यांनी ही स्पर्धा प्रायोजित केली आहे. स्पर्धेच्या निमित्ताने असंख्य संगीत नाटकांमध्ये अजरामर झालेली लोकप्रिय नाट्यपदे प्रत्यक्षात ऐकण्याची, पाहण्याची संधी रसिकांना मिळणार आहे. स्पर्धेला गोवा, कर्नाटकचा सीमावर्ती भाग व महाराष्ट्रातील पात्र स्पर्धकाला स्पर्धेत सहभाग देण्यात येणार आहे. यामध्‍ये २० स्पर्धकांना सहभाग देण्यात येणार आहे. संयोजक महेंद्र मातोंडकर यांच्याशी नावनोंदणीसाठी संपर्क साधावा, असे आवाहन नितीन मांजरेकर, उमेश येरम, सचिन वालावलकर मित्रमंडळाचे अध्यक्ष संतोष परब, समर्पण फाउंडेशनचे अध्यक्ष सुहास कोळसुलकर व शाश्वत सेवा संस्थेच्या अध्यक्षा मिताली मातोंडकर यांनी केले आहे.