भरदिवसा घर फोडून सव्वा लाखाचा ऐवज लांबवला

नाचणेत भरदिवसा घरफोडी;
सव्वा लाखाचा ऐवज चोरीस
रत्नागिरी, ता. १३ः शहरानजीकच्या नाचणे येथे चोरट्यांनी भरदिवसा घर फोडून सव्वा लाखांचा ऐवज लांबवला. ही घटना शुक्रवारी (ता. ११) दुपारी १२ ते १२.३० वाजण्याच्या सुमारास घडली. कुलूप कडीसह उचकटून चोरट्याने ही चोरी केली.
या प्रकरणी सचिन ज्ञानेश्वर टेकाळे (वय ४४, रा. दैवज्ञ भवनजवळ नाचणे, रत्नागिरी) यांनी शहर पोलिसात तक्रार दिली आहे. त्यानुसार, अनोळखीने त्यांच्या घराच्या मुख्य दरवाजाचे कुलूप कडीसह उचकटवून घरात प्रवेश केला. त्यानंतर कपाटातील लॉकर उघडून त्यातील २ तोळे सोन्याचे ८० हजारांचे मंगळसूत्र, २० हजारांची चेन, ४ हजारांचे गळ्यातील दोन पान, ४ हजार ८०० रुपयांचे कानातले, १२ हजारांच्या कानातील रिंग, ४०० रुपयांची सोन्याची फुली, ३ हजारांच्या तीन चांदीच्या चेन, १ हजार ५०० रुपयांचे पैंजण आणि १ हजारांच्या चांदीच्या तीन अंगठ्या, असा एकूण १ लाख २६ हजार ७०० रुपयांचा मुद्देमाल लांबवला.