न्हावेलीत २० ला गुरुकुल अभिवादन

न्हावेलीत २० ला
गुरुकुल अभिवादन
न्हावेलीः न्हावेली येथील संगीत शिक्षण संस्थेचा गुरुकुल अभिवादन सोहळा रविवारी (ता.२०) मळगाव येथील श्री भगवती हॉल येथे आयोजित केला आहे. यावेळी गुरू पूजनासह संस्थेतील विद्यार्थ्यांचे गायन व विविध सांस्कृतिक कार्यक्रम होणार आहेत. सोहळ्याचे उद्घाटन सकाळी ९.३० वाजता जिल्हाधिकारी अनिल पाटील यांच्या हस्ते होणार आहे. यावेळी प्रमुख पाहुणे म्हणून उपजिल्हाधिकारी तथा निवडणूक निर्णय अधिकारी बालाजी शेवाळे, तळवडे मठाधिपती तथा सावंतवाडी संस्थान राजगुरू राजेंद्रस्वामी भारती महाराज, जिल्हा विधी सेवा प्राधिकरणच्या श्रीमती संपूर्णा गुंडेवाडी उपस्थित राहणार आहेत. कार्यक्रमाच्या उद्घाटनानंतर सकाळी १० वाजता गुरुकुल संगीत शिक्षण संस्थेचे विद्यार्थी प्रार्थना, सकाळी १०.१५ वाजता संगीत अलंकार गुरुवर्य दीप्तेश मेस्त्री यांचे गायन, ११ ते १.३० वाजता गुरुकुल संगीत शिक्षण संस्थेच्या विद्यार्थ्यांचे गायन, २.३० ते ४ विद्यार्थ्यांचे गायन, सायंकाळी ४ वाजता गुरुपूजन सोहळा, ५.३० वाजता विद्यालयातील ज्येष्ठ विद्यार्थ्यांचे भैरवी गायन आणि कार्यक्रमाची सांगता होणार आहे.
-----------------
‘सिलकोट’ नंतरच
रस्त्यांची बिले द्या!
कणकवली ः बीडवाडी हुंबरणे मुख्य रस्ता ते प्रभाकर चव्हाण यांच्या घरापर्यंत जाणारा रस्ता व बीडवाडी मांगरवाडी रस्ता खडीकरण, डांबरीकरण करणे या रस्ताकामांचे सिलकोट झालेले नाही. या रस्त्यांचे सिलकोट झाल्यानंतरच रक्कम अदा करावी, अशी मागणी बीडवाडी येथील दादा भोगले यांनी जिल्हा परिषद बांधकामच्या उपअभियंत्यांकडे निवेदनाद्वारे केली आहे. बीडवाडी हुंबरणे मुख्यरस्ता ते प्रभाकर चव्हाण घरापर्यंतच्या या कामासाठी जनसुविधामधून १० लाख, तर प्र.जि.मा. क्र. १९ ते बीडवाडी मांगरवाडी रस्ता खडीकरण व डांबरीकरण कामासाठी आठ लाख रुपये मंजूर होते. ही कामे आपल्या तांत्रिक सल्लागार यांच्या देखरेखीखाली सुरू होती व ती पूर्ण झाली. परंतु, ही दोन्ही डांबरीकरण कामे पाहता कामांमध्ये मक्तेदाराने डांबरीकरण कामाचे अंतिम टप्पे कार्पेट व सिलकोट करणे असे दोन टप्पे न करता, फक्त कार्पेट करून सिलकोट न करता पूर्ण केले आहेत. आपल्या कार्यालयाकडून खातरजमा न करता देयके अदा करण्यात आली आहेत, असे समजते. या कामांची देयके दिली नसल्यास उर्वरित शिल्लक (सिलकोट करणे) काम पूर्ण केल्यावर देयके अदा करावीत, असे म्हटले आहे.
--------------
वैश्य समाज गुणवंतांचा
२० ला वेंगुर्लेत गौरव
वेंगुर्ले ः तालुक्यातील वैश्य समाजातील दहावी, बारावी, पदवी, पदव्युत्तर परीक्षेतील गुणवंत विद्यार्थ्यांचा सत्कार आणि गरजू विद्यार्थ्यांना शैक्षणिक-आर्थिक मदत वितरण कार्यक्रम रविवारी, २० जुलै रोजी सायंकाळी ५ वाजता साई डिलक्स हॉल येथे होणार आहे. कार्यक्रमाचे अध्यक्षस्थान उद्योजक व विठ्ठल मंदिर ट्रस्ट, सावंतवाडीचे विश्वस्त महेश उर्फ आबा श्रीकृष्ण केसरकर हे भूषविणार आहेत. दहावीत ८० टक्के गुण, बारावीत ७० टक्केपेक्षा जास्त गुण मिळविलेल्या आणि पदवी, पदव्युत्तर परीक्षा उत्तीर्ण झालेल्या विद्यार्थ्यांनी आपल्या गुणपत्रिकेची झेरॉक्स प्रत राकेश सापळे यांच्याकडे जमा करावी. शैक्षणिक आर्थिक मदतीचे अर्ज १८ पूर्वी भरून द्यावेत. यासंदर्भात अधिक माहितीसाठी कपिल पोकळेंशी संपर्क साधावा. या कार्यक्रमाला पालक व समाज बांधवांनी उपस्थित राहवे, असे आवाहन वेंगुर्ले तालुका वैश्य समाज अध्यक्ष सुनील डुबळे यांनी केले आहे.