''पशुसंवर्धन''ची तब्बल १०३ पदे रिक्त

‘पशुसंवर्धन’ची तब्बल १०३ पदे रिक्त
यंत्रणेवर अतिरिक्त ताणः शासकिय योजना राबवताना कसरत
नंदकुमार आयरेः सकाळ वृत्तसेवा
सिंधुदुर्गनगरी, ता. १४ः जिल्ह्यातील पशुधनाचे संवर्धन व संरक्षण करणाऱ्या जिल्हा पशुसंवर्धन विभागातील तब्बल १०३ पदे रिक्त असल्याने जिल्ह्याच्या पशुसंवर्धन यंत्रणेवर अतिरिक्त कामांचा ताण निर्माण झाला आहे. शासनाच्या पशुसंवर्धनासाठी विविध योजना राबवताना रिक्त पदांमुळे कसरत करावी लागत आहे.
जिल्ह्यातील पशुधन वाढविण्यासाठी आणि त्यांच्या संवर्धनासाठी जिल्ह्याचा पशुसंवर्धन विभाग प्रयत्नशील आहे. शासनाच्या विविध योजना शेतकऱ्यांपर्यंत पोहोचविण्याबरोबरच रोगप्रतिबंधक लसीकरण आणि सात रोग नियंत्रण अशी मोठी जबाबदारी हा विभाग पार पाडीत आहे. यावर्षी या विभागामार्फत जिल्ह्यातील पशुधनाची गणना करण्याचे काम पार पाडण्यात आले असे असले तरी या विभागातील मोठ्या प्रमाणात रिक्त असलेल्या पदांमुळे कार्यरत यंत्रणेवर कमालीचा ताण पडत असल्याचे दिसून येत आहे.
जिल्ह्यात सुमारे एक लाख ८८ हजार एवढे पूर्वीच्या पशुगणनेनुसार पशुधन आहे. नव्या पशुगनेनुसार त्यामध्ये आठ ते दहा टक्के घट होण्याची शक्यता आहे. मात्र, ऑनलाईन पार पडलेल्या पशुगणनेच्या अहवालाला केंद्राची मंजुरी मिळाल्यानंतरच प्रत्यक्ष जिल्ह्यात पशुधन किती आहे? हे स्पष्ट होणार आहे.
शासनाने आता राज्य व जिल्हा परिषद पशुसंवर्धन विभाग एकत्रीकरण केले असून जिल्ह्यातील श्रेणी २ चे सर्व पशु दवाखाने श्रेणी १ मध्ये रूपांतर केले आहेत. त्यामुळे जिल्ह्याचा रिक्त पदांमध्ये वाढ झाली आहे. जिल्ह्यात सद्यस्थितीत कार्यरत असलेल्या १०२ पशु दवाखान्यांपैकी फिरते ७ दवाखाने बंद केल्याने आता ९५ पशु दवाखान्यामार्फत जिल्ह्याच्या पशुधनाचे संवर्धन केले जाणार आहे तर या विभागावर आता जिल्हा परिषद मुख्य कार्यकारी अधिकारी यांचे नियंत्रण राहणार आहे. यामुळे जिल्ह्यातील पशुधनाची काळजी घेणाऱ्या कार्यरत यंत्रणेवर अतिरिक्त कामाचा ताण असल्याचे दिसून येत आहे.

चौकट
पदाचे नाव*मंजूर पदे*भरलेली*रिक्त
सहाय्यक आयुक्त*२०*६*१४
पशुधन विकास अधिकारी*९१*२०*७१
पशुधन विकास अधिकारी (गट-ब)*८*१*७
पशुधन पर्यवेक्षक*९६*८५*११
एकूण*२१५*११२*१०३

कोट
सिंधुदुर्ग जिल्ह्याच्या पशुसंवर्धन विभागातील महत्त्वाची १०३ अधिकाऱ्यांची पदे सद्यस्थितीत रिक्त आहेत, याचा यंत्रणेवर ताण येत असला तरी शासनाच्या सर्व योजना आणि पशुधनाची आरोग्य सेवा सर्व पशु दवाखान्यामार्फत सुरळीत सुरू आहे. रिक्त पदे भरण्याबाबत शासनाला अहवाल सादर करण्यात आलेला आहे. ही पदे लवकरच भरली जातील.
- डॉ. रवींद्र दळवी, सहाय्यक आयुक्त, पशुसंवर्धन विभाग सिंधुदुर्ग (मुख्यालय)