नेत्र तपासणी, वृक्ष वाटप कार्यक्रम

रत्नेश्वर ग्रंथालयातर्फे उद्या
नेत्रतपासणी, वृक्ष वाटप
सकाळ वृत्तसेवा
रत्नागिरी, ता. १४ : तालुक्यातील धामणसे येथील श्री रत्नेश्वर ग्रंथालयाच्या सुवर्ण महोत्सवी वर्षानिमित्त समाजोपयोगी उपक्रमांची मालिका राबवण्यात येत आहे. त्या अंतर्गत १६ जुलैला दोन कार्यक्रमांचे आयोजन केले आहे.
या दिवशी अहमदाबादच्या जोशी टेक्नॉलॉजी इंटरनॅशनलच्या सहकार्याने आणि नंदादीप नेत्रालयाच्या संयुक्त विद्यमाने मोफत नेत्रतपासणी शिबिर होणार आहे. प्रथम येणाऱ्या १५० लोकांना वाचनासाठी मोफत चष्मे देण्यात येणार आहेत. हे शिबिर स्व. डी. एम. जोशी सभागृहात सकाळी १०.३० ते दुपारी ४ या वेळेत होणार आहे.
दुसरा उपक्रम एक झाड आईच्या नावाने. पंतप्रधान नरेंद्र मोदी यांच्या संकल्पनेतून सलग दुसऱ्या वर्षी हे वृक्षवाटप करण्यात येणार आहे. यात काजू, बेल, चिंच, आवळा, सोनचाफा, पेरू, खैर, साग व कडूनिंब या प्रकारच्या चांगल्या दर्जाच्या रोपांचे मोफत वाटप करण्यात येणार आहे. हा कार्यक्रम ग्रंथालयाच्या प्रांगणात धामणसे येथे सकाळी ११ वाजता होईल. नेत्रतपासणी व चष्मा वाटप कार्यक्रमाचे उद्‍घाटन धामणसे गावचे सरपंच अमर रहाटे यांच्या हस्ते व एक झाड आईच्या नावे या उपक्रमात वृक्षवाटप श्री रत्नेश्वर ग्रंथालयाचे अध्यक्ष उमेश कुळकर्णी यांच्या हस्ते होणार आहे.