कणकवली : काजू प्रक्रिया कार्यशाळा

काजू प्रक्रिया उद्योग
कार्यशाळा २० ला
कणकवलीः येथील गोपुरी आश्रमात संकल्प प्रतिष्ठानतर्फे रविवारी (ता.२०) काजू प्रक्रिया उद्योगाविषयी मोफत कार्यशाळा होणार आहे. सकाळी दहा वाजता कार्यशाळेला सुरवात होईल. या कार्यशाळेत काजू प्रक्रियेची माहिती, यंत्रसामग्री, यशस्वी उद्योजकांचे अनुभव आणि शासकीय अनुदानाविषयी मार्गदर्शन दिले जाणार आहे. संकल्प प्रतिष्ठान गेल्या १४ वर्षांपासून उद्योग, व्यवसाय आणि कृषी क्षेत्रात मार्गदर्शन करत आहे. यामुळे अनेक सुशिक्षित बेरोजगार, महिला आणि शेतकऱ्यांनी स्वतःचे उद्योग सुरू केले आहेत. काजू प्रक्रिया उद्योग कोकणात विशेषतः फायदेशीर ठरू शकतो, कारण येथे काजूचे उत्पादन मोठ्या प्रमाणात होते. या उद्योगात काजू वाळवणे, उकळणे, कवच फोडणे, ग्रेडिंग, पॅकिंग अशा प्रक्रिया यंत्रांच्या साहाय्याने केल्या जातात. यातून फ्लेवर्ड काजू, बर्फी, चिक्की अशी मूल्यवर्धित उत्पादने तयार होतात.
शासकीय योजनांद्वारे २५ ते ३५ टक्‍के अनुदान मिळू शकते. हा व्यवसाय घरगुती स्वरूपात किंवा गटाने सुरू करता येऊ शकतो, ज्यामुळे गृहिणी आणि तरुणांसाठी ही सुवर्णसंधी आहे. या कार्यशाळेत सहभागासाठी नोंदणी आवश्यक असून, संपर्कासाठी संकल्प प्रतिष्ठान, वागदे, कणकवली येथे संपर्क साधावा.