‘शिक्षकेतर’ संघटनेचे योगदान स्तुत्य

77646

‘शिक्षकेतर’ संघटनेचे योगदान स्तुत्य

विलास मोडक; सिंधुदुर्गनगरीत गुणवंत विद्यार्थ्यांचा गौरव

सकाळ वृत्तसेवा
ओरोस, ता. १५ ः सिंधुदुर्ग जिल्ह्यातील मुलांच्या यशामध्ये मोठे योगदान जिल्ह्यातील शिक्षकेतर कर्मचारी संघटनेच्या वतीने आयोजित वेगवेगळ्या स्पर्धा परीक्षांचे आहे, असे प्रतिपादन निवृत्त बँक अधिकारी विलास मोडक यांनी संघटनेच्यावतीने आयोजित पाल्यांच्या गौरव सोहळ्यात केले.
सिंधुदुर्ग जिल्हा शिक्षकेतर कर्मचारी संघटनेतर्फे आयोजित शिष्यवृत्ती परीक्षा उत्तीर्ण, दहावी व बारावी परीक्षेत उज्ज्वल यश प्राप्त केलेल्या तसेच अन्य क्षेत्रांत उल्लेखनीय कामगिरी करणाऱ्या शिक्षकेतर कर्मचारी, पाल्यांचा गौरव सिंधुदुर्गनगरी येथील माध्यमिक पतपेढी सभागृहात आयोजित करण्यात आला. यावेळी सिंधुदुर्ग जिल्हा माध्यमिक, उच्च माध्यमिक व अध्यापक विद्यालय शिक्षकेतर कर्मचारी संघटनेचे सभासद मोठ्या संख्येने उपस्थित होते.
व्यासपीठावर विलास मोडक यांच्यासह प्रमुख अतिथी पाट हायस्कूल सहायक शिक्षिका अंकिता मोडक, प्रा. डॉ. श्रीराम दीक्षित, रेडी माजी उपसरपंच गायत्री सातोसकर, प्रमोद खांडेकर, दत्तात्रय पाटील, संघटनेचे जिल्हाध्यक्ष अनिल राणे, कार्याध्यक्ष प्रदीप सावंत, सचिव गजानन नानचे, उपाध्यक्ष धनश्री गावडे, सुहास देसाई, शरद कांबळे आदी उपस्थित होते.
जिल्हा शिक्षकेतर संघटनेतर्फे देण्यात येणारा जीवनगौरव पुरस्कार यावेळी मडुरा हायस्कूलचे निवृत्त मुख्याध्यापक दशरथ घाडी, राधानगरी-धामणवाडी विद्यामंदिर मुख्याध्यापक दत्तात्रय पाटील, कार्यतत्पर पुरस्कार सिंधुदुर्ग वेतन व भविष्य निर्वाह निधी पथक मुख्य लिपिक प्रियंका तांबे, सिंधुदुर्ग वेतन व भविष्य निर्वाह निधी पथक वरिष्ठ लिपिक निशा परीट यांना गौरविण्यात आले. विजय गवस यांनी सूत्रसंचालन केले. वैभव केंकरे यांनी आभार मानले.
................
पोषक आहारासह व्यायामही आवश्यक
अंकिता मोडक यांनी, विद्यार्थ्यांनी मोबाईलचा वापर टाळावा. व्यायाम व अभ्यासाकडे लक्ष द्यावे. पोषक आहारही घ्यावा, असे सूचित केले. प्रा. दीक्षित यांनी शिक्षकेतर कर्मचारी संघटनेतर्फे राबविण्यात येणाऱ्या विविध कार्यक्रमांचे कौतुक केले. कार्यक्रमाचे प्रास्ताविक करताना जिल्हाअध्यक्ष राणे यांनी संघटनेवरचे प्रेम कायम ठेवण्याचे आवाहन केले.