टी स्टॉल

एकल महिलांना मोफत ‘टी स्टॉल’
चार तालुक्यात १७ लाभार्थी ; चक्रभेदी, रक्षितम अग्रोनिक्स
सकाळ वृत्तसेवा
रत्नागिरी, ता. १५ ः चक्रभेदी सोशल फाउंडेशन आणि रक्षितम अग्रोनिक्स ओपीसी कंपनीकडून जिल्ह्यातील विधवा व एकल महिलांना रोजगार संधी मिळवून देण्यासाठी १७ लाभार्थ्यांना चविका टी स्टॉल शॉप देण्यात आले आहेत. या स्टॉलसाठी संस्थेकडे २० अर्ज प्राप्त झाले होते.
रक्षितम कंपनीचे अनुशील मेढे आणि चक्रभेदीच्या वैदेही सावंत, आश्लेषा इंगवले यांनी चिपळूण, लांजा, संगमेश्वर, रत्नागिरी या ठिकाणी प्रत्यक्ष लाभार्थी आणि व्यावसायिक ठिकाणं याची पाहणी केली होती. त्यातील सात लाभार्थींना पालकमंत्री उदय सामंत यांच्या हस्ते स्टॉलचे वाटप करण्यात आले. हा कार्यक्रम साळवीस्टॉप येथील बाळासाहेब ठाकरे सभागृहात झाला. या वेळी पालकमंत्री सामंत म्हणाले, ही योजना महिलांना आर्थिक सक्षम करणारी आहे. प्रास्ताविक शिवसेना महिला जिल्हाप्रमुख शिल्पा प्रशांत सुर्वे यांनी केले. त्या म्हणाल्या, विधवा व एकल महिलांना रोजगाराची संधी देण्यासाठी मोफत टी स्टॉल देण्याची ही योजना अत्यंत स्तुत्य आहे. या प्रसंगी अनुशिल मेढे म्हणाल्या, आम्ही रत्नागिरीत लाभार्थी महिला व त्यांचे व्यावसायिक ठिकाण पाहणी करताना आम्हाला जागेची अडचण येणार नाही, असे पालकमंत्री यांनी सांगितले होते. त्याप्रमाणे त्यांनी नियोजन केले. या माध्यमातून महिलांनी २५ ते ३० हजार कमवावेत, अशी अपेक्षा त्यांनी व्यक्त केली.
----
चौकट
या आहेत लाभार्थी
चार तालुक्यातील लाभार्थींमध्ये शीतल शंकर सावंत (चिपळूण), दीपाली दिनकर गावडे (रत्नागिरी), रुचिता रवींद्र सुर्वे (रत्नागिरी), पूजा अंकुश सुर्वे (चिपळूण), दीपाली नरेंद्र विचारे (सावर्डा), समीक्षा गुरुनाथ सावंत (रत्नागिरी), संपदा प्रमोद सावंत (रत्नागिरी) यांचा समावेश आहे.