भेडशी पुलाच्या रस्त्याची उंची वाढवा

77763

भेडशी पुलाच्या रस्त्याची उंची वाढवा

ग्रामस्थांची मागणी; सदोष कामामुळे निधी वाया गेल्याचा आरोप

सकाळ वृत्तसेवा
दोडामार्ग, ता. २५ : दोडामार्ग-तिलारी मुख्य राज्यमार्गावरील भेडशी येथील नदीवर नव्याने बांधलेल्या पुलाच्या एका बाजूने रस्त्यावर पुराचे पाणी येऊन वाहतूक बंद होण्याच्या घटना घडत आहेत. पुलाला जोडणारा रस्ता पाण्याखाली जात असल्याने खर्ची घालण्यात आलेला कोट्यवधींचा निधी वाया गेला आहे. त्यामुळे पुलाच्या दोन्ही बाजूला असलेल्या रस्त्यांची उंची वाढविण्यात यावी, अशी मागणी जोर धरू लागली आहे.
दोडामार्ग-कोल्हापूर राज्य मार्गावरील साटेली-भेडशी गावातील भेडशीमधील दामोदर देवस्थान नजीक फार पूर्वीपासून असलेल्या छोट्या पुलाची उंची वाढविण्याची सातत्याने मागणी होत होती. लालफितीत अडकलेल्या या पुलाची उंची वाढविण्याच्या कामाला अखेर अलीकडील काही वर्षांत मुहूर्त मिळाला. गतवर्षी पूर्ण झालेला हा पूल वाहतुकीसाठी खुला झाला; परंतु गतवर्षीच्या पहिल्याच पावसात या पूलाचा नेमका उपयोग तरी काय, असा प्रश्न उपस्थित झाला आहे. कारण पुलाच्या एका बाजूच्या रस्त्यावर पुराचे पाणी आल्याने वारंवार वाहतूक ठप्प झाली होती. गतवर्षी या ठिकाणी दोन वाहने वाहून जाण्याचा प्रकार देखील घडला होता.
----
मागणीकडे दुर्लक्ष केल्याने संताप
गतवर्षी उद्भवलेल्या परिस्थितीच्या अनुषंगाने स्थानिक ग्रामस्थांकडून यावर्षीही संताप व्यक्त केला आहे. गेल्यावर्षीच बांधकाम विभागाचे लक्ष वेधले होते. या रस्त्याची उंची तालुका क्रीडांगणाकडील रस्त्याएवढी करण्यात यावी, अशी मागणी भेडशी ग्रामविकास कमिटी अध्यक्ष भाऊ टोपले आणि ग्रामस्थांनी केली आहे; मात्र त्या मागणीकडे दुर्लक्ष झाल्याने संताप व्यक्त करण्यात येत आहे.