सर्व्हिस सेंटरमधून दुचाकीची चोरी

सर्व्हिस सेंटरमधून
दुचाकीची चोरी
चिपळूण : तालुक्यातील सती येथील रॉयल एन्फिल्ड शोरूममध्ये सर्व्हिसिंगसाठी लावलेली मोटारसायकल चोरीला गेल्याची घटना ४ जुलैला रात्री घडली. याप्रकरणी येथील पोलिसांत एकावर गुन्हा दाखल केला आहे. मारुती आत्माराम मेस्‍त्री (वय २६, रा. नागावे, चिपळूण) असे गुन्हा दाखल झालेल्या तरुणाचे नाव आहे. याबाबतची फिर्याद सर्वेश उमेश साळुंखे (२२, रा. मार्कंडी, गुलमोहर अपार्टमेंट, चिपळूण) यांनी दिली आहे. सती येथील रॉयल एन्फिल्ड शोरूममध्ये सूरज सुनील चव्हाण (रा. मार्गताम्हाणे) यांनी एक लाख २० हजार रुपये किमतीची मोटारसायकल सर्व्हिसिंगसाठी लावली होती; मात्र मारुती आत्माराम मेस्‍त्री यांने फिर्यादी यांच्या संमतीशिवाय लबाडीच्या इराद्याने चोरून नेली.
...........
दुचाकीवरून पडलेल्या
महिलेचा मृत्यू
पावस : तालुक्यातील गावडे-आंबेरे मार्गावर दुचाकीवरून तोल जाऊन पडल्याने जखमी झालेल्या महिलेचा कोल्हापूर येथील सीपीआर हॉस्पिटलमध्ये उपचारादरम्यान मृत्यू झाल्याची दुर्दैवी घटना घडली. मृत महिलेचे नाव मेघा टोलू डोर्लेकर (वय ५०, रा. मेर्वी, ता. जि. रत्नागिरी) असे आहे. ६ जुलैला दुपारी ३.३० वाजता डोर्लेकर या दुचाकीवरून प्रवास करत असताना गावडे-आंबेरे गावाजवळ त्यांचा दुचाकीवरील तोल जाऊन त्या रस्त्यावर पडल्या. अपघातानंतर त्यांना तत्काळ रत्नागिरीतील शासकीय रुग्णालयात नेण्यात आले; मात्र प्रकृती चिंताजनक असल्यामुळे त्यांना पुढील उपचारांसाठी कोल्हापूरला हलविण्यात आले.