लोटेमाळ येथील बँक ऑफ इंडियाच्या शाखेत चोरी

बँक ऑफ इंडियाच्या
लोटेमाळ शाखेत चोरी
खेड, ता. १५ : तालुक्यातील लोटेमाळ येथील बँक ऑफ इंडिया शाखेत घडलेल्या चोरीच्या घटनेमुळे खळबळ उडाली आहे. चोरट्यांनी १३ जुलैला सायंकाळी ४.३० ते रात्री ८.४५ दरम्यान बँक फोडून एकूण ४५ हजार ५०० रुपयांचा मुद्देमाल पळविला. याप्रकरणी संदेश दिलीप खरात (वय ३६, सध्या रा. रावतळे, चिपळूण, मूळ रा. मलकापूर, अकोला) यांनी खेड पोलिसांत तक्रार दिली. त्यानुसार खेड पोलिस ठाण्यात गुन्हा दाखल करण्यात आला आहे.
चोरट्याने लोखंडी कटावणी, हातोडा व हेक्सॉ ब्लेड वापरून बँकेच्या कॅशिअर केबिनमागील स्लायडिंग खिडकीची काच फोडली. त्यानंतर लोखंडी ग्रील वाकवून आत प्रवेश करत बँकेच्या कार्यालयातून वस्तू चोरल्या. ४० हजारांचा लॅपटॉप, पाच हजारांचा स्कॅनर, ५०० रुपयांची सुटकेस असा मुद्देमाल चोरून नेला. पोलिसांनी पंचनामा केला असून, सीसीटीव्ही फूटेज, फिंगर प्रिंट्स आणि स्थानिक माहितीदारांच्या आधारे तपास सुरू आहे.