वेदांत, निखिल, आतिश ठरले विजेते

वेदांत, निखिल, आतिश यांचे यश
गोवळकोट विषयावर रिल स्पर्धा ; राजे सामाजिक प्रतिष्ठानचे आयोजन
सकाळ वृत्तसेवा
चिपळूण, ता १६ : ऐतिहासिक गोविंदगडाच्या संवर्धनासाठी कार्यरत गोवळकोट येथील राजे सामाजिक प्रतिष्ठानचा अकरावा वर्धापन दिन साजरा करण्यात आला. या निमित्त गोविंदगड विषयावर आधारित आयोजित रील स्पर्धेत वेदांत शितप प्रथम, निखिल पवार द्वितीय तर आतिश तांबे यांने तृतिय क्रमांक पटकाविला.
चिपळूण येथे झालेल्या या कार्यक्रमाची सुरुवात दीपप्रज्वलन व छत्रपती शिवरायांच्या प्रतिमेला पुष्पहार अर्पण करून झाली. त्यानंतर प्रतिष्ठानचे अध्यक्ष विशाल राऊत यांनी सर्व उपस्थितांचे स्वागत''केले. प्रस्तावनेत राऊत यांनी संस्थेच्या ११ वर्षांच्या सामाजिक वाटचालीचा थोडक्यात आढावा घेतला. ते म्हणाले, ‘ही फक्त सुरुवात आहे, गडाच्या संवर्धनासाठी आमची घोडदौड सुरूच राहील. तसेच गोविंदगडाचा गौरवशाली इतिहास नव्या पिढीपर्यंत पोहोचवण्यासाठी ही रील स्पर्धा आहे,’ असेही सांगितले. या कार्यक्रमासाठी चिपळूण अर्बन बँकेचे अध्यक्ष मोहन मिरगल, वैश्य नागरी पतसंस्थेचे उपाध्यक्ष तुषार रेडीज, माजी केंद्रप्रमुख सौ. आखाडे, शिवाजी गोवळकर आदी उपस्थित होते. मोहन मिरगल यांनी राजे प्रतिष्ठानच्या उपक्रमांचे कौतुक करताना, गोविंदगडाच्या संवर्धनासाठी आवश्यक ते सहकार्य देण्याची ग्वाही दिली. तुषार रेडीज यांनी संस्थेच्या कार्यपद्धतीचा गौरव केला. श्रीमती आखाडे यांनी प्रतिष्ठानचे काम गौरवास्पद असल्याचे सांगितले.
---