दोडामार्गात २३ ला कर्करोग चिकित्सा

दोडामार्गात २३ ला
कर्करोग चिकित्सा
दोडामार्ग ः कॅन्सर डायग्नॉस्टिक व्हॅन सिंधुदुर्गमध्ये दाखल झाली असून देवगड येथून चिकित्सेस सुरुवात झाली आहे. तसेच २३ जुलैला ग्रामीण रुग्णालय, दोडामार्ग येथे ही व्हॅन येणार आहे. महाराष्ट्र शासनाच्या सार्वजनिक आरोग्य विभागामार्फत राष्ट्रीय असंसर्गजन्य रोग नियंत्रण कार्यक्रमांतर्गत कर्करोग चिकित्सा व जनजागृती मोहीम सुरू केली आहे. सुसज्ज ‘कॅन्सर डायग्नॉस्टिक व्हॅन’ जिल्ह्यातील ग्रामीण भागांत जाऊन तेथील आरोग्य कर्मचाऱ्यांच्या मदतीने रुग्णचिकित्सा करणार आहे. व्हॅनमध्ये तज्ज्ञ डॉक्टरांसह सर्व सुविधा उपलब्ध आहेत. ही कॅन्सर डायग्नॉस्टिक व्हॅन २२ जुलैला साटेली-भेडशी प्राथमिक आरोग्य केंद्र, २३ ला ग्रामीण रुग्णालय दोडामार्ग, २४ ला मोरगाव प्राथमिक आरोग्य केंद्रात येणार आहे. रुग्णांनी लाभ घेण्याचे आवाहन ग्रामीण रुग्णालय दोडामार्गचे वैद्यकीय अधीक्षक डॉ. आकाश एडके, तालुका आरोग्य अधिकारी डॉ. जगदीश पाटील यांनी केले आहे.
-----
गांधी विद्यामंदिरतर्फे
‘तरवा’ लावणीचे धडे
सावंतवाडी ः शासनाकडून सुरू असलेल्या ‘बांधावरची शाळा’ उपक्रमांतर्गत सातार्डा येथील महात्मा गांधी विद्यामंदिर प्राथमिक शाळा क्र. १ मधील विद्यार्थ्यांनी शेतीच्या कामाचा आनंद घेतला. मुख्याध्यापक दासू गावित यांच्या मार्गदर्शनाखाली श्रीकृष्ण कोरगावकर यांच्या शेतमळ्यात तरवा लावणीचे प्रात्यक्षिक घेण्यात आले. शेतकऱ्यांना भातपीक घेण्यासाठी कशा प्रकारची कामे करावी लागतात, याची माहिती शेतकरी श्री. कोरगावकर यांनी विद्यार्थ्यांना दिली. विद्यार्थ्यांनी विविध गाणी गात तरवा लावणीच्या प्रात्यक्षिकामध्ये आनंदाने सहभाग घेतला. यावेळी पालक, ग्रामस्थ, शिक्षक उपस्थित होते.
......................
साईशा फटनाईकला
ग्रामीण शिष्यवृत्ती
सावंतवाडी ः फेब्रुवारीमध्ये झालेल्या पूर्व उच्च प्राथमिक शिष्यवृत्ती परीक्षेत (पाचवी) शाळा पेंढऱ्याचीवाडी, पेंडूरची (ता. वेंगुर्ले) विद्यार्थिनी साईशा फटनाईक हिने ग्रामीण सर्वसाधारण शिष्यवृत्ती मिळविली. तिला या यशात मार्गदर्शक शिक्षक समीर तेंडोलकर, मुकुंद काळोजी व मुख्याध्यापिका देवयानी आजगावकर व पालकांनी मार्गदर्शन केले. सलग दुसऱ्या वर्षी या शाळेच्या विद्यार्थिनीने शिष्यवृत्तीधारक बनून शाळेच्या गौरवशाली इतिहासात मानाचा तुरा रोवला. याबद्दल तिचे सरपंच संतोष गावडे, उपसरपंच समीक्षा तांडेल, शाळा व्यवस्थापन समिती अध्यक्ष सत्यवान बरकुटे, उपाध्यक्ष विनंती कोळेकर आदींनी अभिनंदन केले.
----
शिष्यवृत्ती परीक्षेत
युगा घाडी प्रथम
कुडाळ ः महाराष्ट्र राज्य परीक्षा परिषद, पुणेमार्फत घेतलेल्या पूर्व उच्च प्राथमिक (पाचवी) शिष्यवृत्ती परीक्षेत ओरोस येथील डॉन बॉस्को हायस्कूलची युगा घाडी हिने ८३.२२ टक्के गुण मिळवून राष्ट्रीय ग्रामीण शिष्यवृत्ती परीक्षेत कुडाळ तालुक्यात प्रथम क्रमांक पटकावला. तिने जिल्ह्यात अकराव्या क्रमांकावर यश प्राप्त केले आहे. तिचे प्रशाला, तसेच कसाल येथील मित्रपरिवारातर्फे अभिनंदन करण्यात येत आहे.