तळकट पंचक्रोशीत बीएसएनएल ठप्प

swt1612.jpg
77903
कणकवली ः येथे खासदार नारायण राणे यांना तळकट सरपंच सुरेंद्र सावंत-भोसले यांनी निवेदन सादर केले. यावेळी उपस्थित संतोष नानचे, अंकुश जाधव, फोंडू हडीकर, प्रज्योत देसाई व इतर.

तळकट पंचक्रोशीत बीएसएनएल ठप्प
प्रशासकीय कामांमध्ये व्यत्ययः सरपंचांनी वेधले खासदार नारायण राणेंचे लक्ष
सकाळ वृत्तसेवा
दोडामार्ग, ता. १६ ः तळकट गावासहित संपूर्ण पंचक्रोशीत बीएसएनएलची रेंज मिळण्यात वारंवार अडथळे येत आहेत. खासगी कंपन्यांची रेंज उपलब्ध होण्यासंदर्भात कार्यवाही करण्याची मागणी तळकट सरपंच सुरेंद्र सावंत-भोसले तसेच परिसरातील ग्रामस्थांनी खासदार नारायण राणे यांच्याकडे केली.
सुपारी, नारळ, केळी, भात आदी शेतीबागायतींसाठी समृद्ध म्हणून ओळखणाऱ्या येणाऱ्या तळकट गावासहित संपूर्ण पंचक्रोशीतील गावांना बीएसएनएलची नेटवर्क सुविधा चांगल्या प्रकारे मिळत नाही. ग्रामपंचायत, रेशन दुकान, शाळा, बँक, प्राथमिक आरोग्य केंद्र तसेच अन्य ठिकाणी ही रेंज नसल्याने अनेकांना अडचणी येत आहेत. अनेक प्रशासकीय कामे अक्षरशः खोळंबून राहतात. पंचक्रोशीतील ग्रामस्थांनी या संदर्भात वारंवार बीएसएनएलचे लक्ष वेधले आहे. परंतु, त्याचा काहीही उपयोग झालेला नाही. त्या पार्श्वभूमीवर माजी मुख्यमंत्री तथा विद्यमान खासदार राणे यांची तळकट सरपंच सावंतभोसले यांनी भेट घेतली व त्यांचे याकडे लक्ष वेधले. त्यांच्यासोबत असलेल्या संतोष नानचे यांनी देखील तळकट पंचक्रोशीमध्ये बीएसएनएल रेंजची सध्याची अवस्था व खासगी कंपन्यांची रेंज किती आवश्यक आहे? ते स्पष्ट केले. दरम्यान, या संदर्भात संबंधित अधिकाऱ्यांशी बोलून आवश्यक ती पुढील कार्यवाही करण्याचे सुतोवाच श्री. राणे यांनी केले. जिल्ह्यात समृद्ध शेती बागायतींचा भाग म्हणून सुपरिचित असलेल्या तळकट दशक्रोशीमध्ये केवळ मोबाईल रेंजच नव्हे तर अन्य विकास कामे होण्यासाठी तेथील ग्रामस्थांच्या निवेदनांना प्राधान्य देऊ, असेही खासदार राणे म्हणाले. यावेळी माजी समाजकारण सभापती अंकुश जाधव, दोडामार्गमधील फोंडू हडीकर उपस्थित होते.