आयी येथे वळणावर ट्रक उलटला

77951
आयी येथे वळणावर ट्रक उलटला

दुर्घटना टळली; नियंत्रण सुटल्याने अपघात

सकाळ वृत्तसेवा
दोडामार्ग, ता. १६ : गोवा ते वझरे कोळसा वाहतूक करणारा दहाचाकी ट्रक आयी येथे वळणावर पलटी होऊन अपघात झाला. सुदैवाने जीवितहानी टळली. मात्र, ट्रकचे मोठे नुकसान झाले. हा अपघात मंगळवारी (ता. १५) उशिरा घडला.
गोवा येथून वझरे येथील एका कंपनीला कोळसा वाहतूक करणारा ट्रक मंगळवारी आयीमार्गे वाहतूक करीत होता. येथील एका वळणावर चालकाचे नियंत्रण सुटले व ट्रक पलटी झाला. सुदैवाने चालक बचावला. अपघाताची माहिती स्थानिकांना समजताच ते घटनास्थळी दाखल झाले. अपघातामुळे रस्त्यालगत असलेला संरक्षक कठडा तुटला. ट्रक काढण्यासाठी मशिनरी आणली असता स्थानिकांनी त्याला तीव्र विरोध केला. ट्रक काढायला देणार नाही, अशी तंबी उपस्थित ग्रामस्थांनी दिली.
या मार्गे मोठ्या प्रमाणात दहाचाकी ट्रकमधून ओव्हरलोड कोळसा वाहतूक सुरू आहे. या वाहतुकीमुळे आयी, माटणे, वझरे आदी गावांतील ग्रामस्थांना मोठा त्रास सहन करावा लागत आहे. गोवा, आयी ते वझरे असे रात्रीच्यावेळी अवैध कोळसा वाहतूक करतात. या कोळसा वाहतुकीमुळे यापूर्वी अनेक अपघात झाले आहेत. मात्र, येथील पोलिस प्रशासनाने दुर्लक्ष केल्याचा आरोप उपस्थित ग्रामस्थांनी केला. या नियमबाह्य कोळसा वाहतुकीला प्रशासनाचे अभय असून, त्याचा नाहक त्रास मात्र ग्रामस्थांना सहन करावा लागत आहे. हे ट्रक रात्रीचे चालवले जातात व कर्णकर्कश आवाज लावून सर्वांची झोपमोड करतात. त्यामुळे या मार्गे होणारी वाहतूक पूर्णतः बंद करावी, अशी मागणी उपस्थित ग्रामस्थांनी केली.