‘कोळपे’मध्ये आखवणे भोम पुनर्वसनचा समावेश

‘कोळपे’मध्ये आखवणे भोम पुनर्वसनचा समावेश

‘वैभववाडी’चा प्रारूप आराखडा; जि.प., पं.स. निवडणुकीची चाहूल

सकाळ वृत्तसेवा
वैभववाडी, ता. १६ ः आगामी जिल्हा परिषद, पंचायत समिती निवडणुकीसाठी प्रारूप आराखडा जाहीर केला आहे. कोळपे पंचायत समितीमध्ये आखवणे भोम पुनर्वसन गावठाणचा समावेश केला आहे. या व्यतिरिक्त कोणतेही मोठे फेरबदल तालुक्यात झालेले नाहीत. मात्र, प्रारूप आराखडा जाहीर झाल्यामुळे इच्छुकांना निवडणुकीची चाहूल लागली असून, त्यांच्याकडून चाचपणीही सुरू झाली आहे.
तालुक्यातील तीन जिल्हा परिषद आणि सहा पंचायत समिती मतदारसंघांचा प्रारूप आराखडा प्रसिद्ध केला आहे. २०१७ च्या प्रारूप आराखड्यात किरकोळ बदल केले आहेत. आखवणे भोम हे गाव पूर्वी भुईबावडा पंचायत समिती मतदारसंघात होते. अरुणा प्रकल्पामुळे या गावातील बहुतांशी प्रकल्पग्रस्तांचे पुनर्वसन मांगवली तिठ्यानजीक केले आहे. अलीकडेच या गावाला ग्रामपंचायतदेखील मंजूर झाली आहे. त्यामुळे हे गाव कोळपे पंचायत समिती मतदारसंघात राहणार आहे. या व्यतिरिक्त कोणतेही बदल झालेले नाहीत.
प्रारूप आराखडा जाहीर झाल्याने इच्छुकांना जिल्हा परिषद आणि पंचायत समिती निवडणुकांची चाहूल लागली आहे. २०२२ मध्ये निवडणुका होणे अपेक्षित होते. मात्र, त्या झाल्या नाहीत. त्यामुळे निवडणुका कधी होणार? या प्रतीक्षेत सर्वच राजकीय पक्षांचे इच्छुक होते. आता जिल्हा परिषद आणि पंचायत समिती मतदारसंघनिहाय आराखडा तयार झाल्यामुळे इच्छुकांकडून चाचपणी सुरू झाली आहे. कोणता मतदारसंघ यापूर्वी कोणत्या प्रवर्गासाठी आरक्षित होता, येत्या निवडणुकीत संभाव्य कोणते आरक्षण असेल, अशा पद्धतीने इच्छुकांकडून अंदाज बांधले जात आहेत. गेल्या निवडणुकीत तीन जिल्हा परिषद मतदारसंघांपैकी कोळपे मतदारसंघ अनुसूचित जाती प्रवर्गातील महिलांसाठी आरक्षित होता. तसेच लोरे जिल्हा परिषद मतदारसंघ इतर मागास प्रवर्ग महिलांसाठी, कोकिसरे जिल्हा परिषद मतदारसंघ इतर मागास प्रवर्गासाठी आरक्षित होता. कोळपे पंचायत समिती-इतर मागास प्रवर्ग महिला, भुईबावडा-इतर मागास प्रवर्ग, लोरे-खुला प्रवर्ग, खांबाळे-इतर मागास प्रवर्ग, कोकिसरे-इतर मागास प्रवर्ग महिला, उंबर्डे पंचायत समिती मतदारसंघ खुला प्रवर्गासाठी होता. गेल्या वेळीच्या आणि तत्पूर्वीच्या आरक्षणाच्या अनुषंगाने इच्छुकांकडून आखाडे बांधले जात आहेत.
---
गावांची स्थिती
जिल्हा परिषद कोळपेतील भुईबावडा पंचायत समितीमध्ये भुईबावडा, ऐनारी, तिरवडे तर्फ सौंदळ, जांभवडे नेर्ले, आखवणे-भोम, मौदे, हेत, उपळे. कोळपे पंचायत समिती मतदारसंघामध्ये कोळपे, तिथवली, नानिवडे, वेंगसर, मांगवली, तिरवडे तर्फ खारेपाटण, आखवणे भोम पुनर्वसन गावठण, लोरे जिल्हा परिषदेमधील खांबाळे पंचायत समितीमध्ये खांबाळे, सांगुळवाडी, नावळे, सडुरे-शिराळे, एडगाव, सोनाळी, लोरे पंचायत समितीमध्ये लोरे, निमअरूळे, कुर्ली, गडमठ, आर्चिणे, अरुळ, कोकिसरे जिल्हा परिषदेमधील उंबर्डे पंचायत समिती मतदारसंघात उंबर्डे, कुसूर, करुळ, कुंभवडे, कोकिसरे पंचायत समिती कोकिसरे, नाधवडे, नापणे या गावांचा समावेश केला आहे.