राजापुरात ७ लाख १९ हजाराचे गोवा मद्य जप्त

७७९२४
राजापुरात गोवा बनावटीची दारू जप्त
राज्य उत्पादन शुल्कची कारवाई ः २२ लाखांच्या मुद्देमालासह संशयित ताब्यात
सकाळ वृत्तसेवा
रत्नागिरी, ता. १६ : राजापूर बसस्थानकाजवळ गोवा बनावटीच्या दारू वाहतुकीवर राज्य उत्पादन शुल्क विभागाने कारवाई केली. आलिशान मोटारीतून सुमारे ७ लाख १९ हजार गोवा बनावटीचे ७७ बॉक्स असलेला दारू साठा जप्त केला. मोटारीसह सुमारे २२ लाख १९ हजारांचा मुद्देमाल जप्त करून चालकाला ताब्यात घेतले. संशयित वाहनचालक बस्त्याव सायमन घोन्सालविस (रा. होडावडा ख्रिश्चनवाडी, ता. वेंगुर्ला, जि. सिंधुदुर्ग) याच्याविरोधात गुन्हा नोंद केला. काल रात्री गस्ती पथकाने ही कारवाई केली.

राज्य उत्पादन शुल्क विभागाच्या भरारी पथकाला गोवा बनावटीच्या दारूची बेकायदेशीर वाहतूक होणार असल्याची गुप्त माहिती मिळाली होती. राज्य उत्पादन शुल्कच्या अधीक्षक कीर्ती शेडगे यांच्या मार्गदर्शनाखाली भरारी पथकाने राजापूर बस स्थानकासमोर सापळा लावला होता. गोव्याकडून मुंबईकडे जाणाऱ्या राष्ट्रीय महामार्गावरून बेकायदेशीररित्या गोवा बनावटीची दारू मोठ्या प्रमाणात अवैधरित्या साठवणूक करून वाहतूक करणार असल्याची माहिती मिळाल्याने वाहनांची तपासणी सुरू केली. यावेळी एका पांढऱ्या रंगाची संशयास्पद मोटार (एमएच ०७ एएस ३४५८) ची झडती घेतली असता, त्यामध्ये फक्त गोवा राज्यात विक्रीस असलेले विविध ब्रॅण्डचे एकूण ७७ बॉक्स सापडले. गाडीसह एकूण २२ लाख १९ हजार ७६० रुपयांचा मुद्देमाल जप्त केला. यामध्ये बेकायेदशीर गोवा मद्याची ७ लाख १९ हजार ७६० एवढा मद्यसाठा आहे. संशयित वाहनचालक बस्त्याव सायमन घोन्सालविस (रा. होडावडा ख्रिश्चनवाडी, ता. वेंगुर्ला, जि. सिंधुदुर्ग) याच्याविरोधात गुन्हा नोंद करण्यात आला आहे. भरारी पथकाचे निरीक्षक अमित पाडळकर, दुय्यम निरीक्षक गणेश जाधव, वैभव सोनावले आदींच्या पथकाने ही कारवाई केली.