गणेशोत्सवापुर्वी दादर-रत्नागिरी पॅसेंजर पूर्ववत करा

दादर-रत्नागिरी पॅसेंजर पूर्ववत करा
प्रवासी संघटनेसह चाकरमान्यांची मागणी; रेल्वे महाव्यवस्थापकांशी भेट
सकाळ वृत्तसेवा
खेड, ता. १७ : दादर-रत्नागिरी पॅसेंजर गाडी २०२० नंतर दादर स्थानकातून सोडण्याऐवजी दिवा स्थानकातून सोडण्यात येऊ लागली. परिणामी अनेक प्रवाशांना याचा फटका बसला असून आता आगामी गणेशोत्सवाआधी या गाडीची सेवा पुन्हा दादर स्थानकातून सुरू करावी, अशी मागणी चाकरमानी करत आहेत. दरम्यान, मुंबईत सुरू असलेल्या अधिवेशनात आमदार भास्कर जाधव यांनी देखील दादर-रत्नागिरी पॅसेंजर पूर्ववत करण्याची मागणी केली आहे.
सन १९९६ पासून रत्नागिरी एलटीटी मार्गावर एक पॅसेंजर गाडी सुरू झाली. पुढे प्रवाशांच्या मागणीनुसार ती रत्नागिरी-दादर पॅसेंजर म्हणून चालवली जाऊ लागली. मार्च २०२० पर्यंत ही गाडी प्रवाशांच्या सेवेत होती. दक्षिण मुंबई, मध्य मुंबई, उत्तर मुंबई, वसई, नालासोपारा, विरार आणि गुजरात दिशेने ये-जा करणाऱ्या प्रवाशांना दादर स्थानक सोयीचे असल्यामुळे आणि दिव्यापुढे सर्व स्थानकांवर थांबत असल्यामुळे ही गाडी सर्वाधिक लोकप्रिय होती.
दादर-रत्नागिरी पॅसेंजर, रत्नागिरी-दादर पॅसेंजर गाडी सर्व स्थानकांवर थांबत असल्याने मुंबईहून कोकणाकडे जाणाऱ्या चाकरमान्यांना याचा मोठा फायदा होत होता. मात्र, कोरोना काळात ही गाडी बंद करण्यात आली. त्यानंतर पुन्हा या गाडीची सेवा पूर्ववत करण्यात आली. मात्र, ही गाडी सध्या दादरऐवजी दिवा स्थानकापर्यंतच थांबवण्यात येत आहे. याचा फटका अंधेरी, विरार, बोरिवली या ठिकाणांहून प्रवास करणाऱ्या प्रवाशांना सर्वाधिक बसू लागला. दरम्यान, प्रवाशांची होणारी गैरसोय, कोकणासाठी धावणाऱ्या गाड्यांवर होणारा अन्याय लक्षात घेत शिवसेना नेते, माजी खासदार विनायक राऊत यांनी , ९ जानेवारी रोजी मध्य रेल्वेचे महाव्यवस्थापक धर्मवीर मीना यांची भेट घेत ही गाडी पूर्ववत करण्याची मागणी केली होती. मात्र अद्याप याबाबत कोणताही निर्णय झाला नसल्याने अवघ्या दीड महिन्यावर येऊन ठेपलेल्या गणेशोत्सवात चाकरमान्यांचे हाल टाळण्यासाठी या गाडीची सेवा दादरपासून पूर्ववत करण्याची मागणी चाकरमानी आणि प्रवासी संघटना करत आहेत.