सावंतवाडीत २३ पासून प्लंबिंग प्रशिक्षण वर्ग

सावंतवाडीत २३ पासून
प्लंबिंग प्रशिक्षण वर्ग
सावंतवाडी ः कोकणातील तरुण रोजीरोटीसाठी मुंबई, पुणे, गोवा या शहरांवर अवलंबून आहे. त्यामुळे येथील घरे कुलूपबंद झालेली आहेत. येथील तरुणाला त्याच्या परिसरातच हाताला काम मिळावे, या दृष्टिकोनातून प्लंबिंगसारख्या व्यवसायाचे प्रशिक्षण अत्यल्प दरामध्ये सावंतवाडीमध्ये उपलब्ध होणार आहे. पुणे येथील ज्ञानदा गुरुकुल संस्था व येथील कळसुलकर इंग्लिश स्कूल यांच्या वतीने प्लंबिंग प्रशिक्षण कळसुलकर इंग्लिश स्कूल येथे २३ जुलैपासून पुढे एक महिना प्रतिदिन चार तास याप्रमाणे होणार आहे. सिंधुदुर्ग जिल्ह्यातील तसेच सावंतवाडी परिसरातील १८ ते ३० वयोगटांतील नवोद्योजक किंवा बेरोजगार तरुणांनी या संधीचा लाभ घ्यावा. प्रवेशासाठी तथा अधिक माहितीसाठी डी. जी. वरक, गौरांग चिटणीस येथे संपर्क साधावा, असे आवाहन सावंतवाडी एज्युकेशन सोसायटीच्या वतीने करण्यात आले आहे.
................
शस्‍त्रकियेसाठी
मदतीचे आवाहन
कुडाळ ः तालुक्यातील पाट येथील कुलदीप सत्यवान नेरुरकर (वय २२) हा आजाराने त्रस्त असून, त्याच्या घरची परिस्थिती हलाखीची आहे. सध्या कुडाळ येथील खासगी हॉस्पिटलमध्ये त्याच्यावर उपचार सुरू आहेत. शस्त्रक्रियेचा खर्च पाहता त्यांना एवढा खर्च शक्य नाही. समाजातील विविध संस्था, दानशूर व्यक्ती, धर्मदाय संस्थांनी सहकार्य करावे, असे आवाहन त्यांच्या कुटुंबीयांच्या वतीने करण्यात आले आहे.
..................
चर्मकार समाजातर्फे
गुणगौरव कार्यक्रम
कुडाळ ः सिंधुदुर्ग जिल्हा चर्मकार समाज उन्नती मंडळ शाखा कुडाळच्या वतीने समाजातील विविध परीक्षेत यश प्राप्त विद्यार्थ्यांचा गुणगौरव व सत्कार समारंभ तीन ऑगस्टला सकाळी १० वाजता कुडाळ हायस्कूलजवळ मराठा समाज हॉल येथे आयोजित केला आहे. शिष्यवृत्ती परीक्षा, नवोदय, दहावी, बारावी, पदविका, पदवी आणि पदव्युत्तर परीक्षा उत्तीर्ण विद्यार्थ्यांचा गौरव तसेच सेवानिवृत्त कर्मचारी, विविध समित्या, संस्थांवर नियुक्त, शासकीय पुरस्कार प्राप्त, जिल्हा, राज्य स्तरावर गुणवत्ता प्राप्त खेळाडू समाजबांधवांचा सत्कार करण्यात येणार आहे. समाजातील उत्तीर्ण विद्यार्थ्यांनी आपले नाव व गुणपत्रिकेची झेरॉक्स प्रत प्रत्यक्ष किंवा रामदास चव्हाण (पंचायत समितीनजीक कुडाळ) व सचिव नरेंद्रकुमार चव्हाण यांच्याकडे २८ जुलैपूर्वी पाठविण्याचे आवाहन तालुका कार्यकारिणीने केले आहे.