साळिस्तेत विद्यार्थ्यांना व्यावहारिक धडे

swt175.jpg
78100
साळिस्ते : वृध्दांसह महिला वर्गानेही प्रतिसाद देत विद्यार्थ्यांकडून रानभाजी खरेदी केली.

साळिस्तेत विद्यार्थ्यांना व्यावहारिक धडे
रानभाजी महोत्सवास प्रतिसाद; शाळा क्र. १ च्या उपक्रमाचे कौतुक
सकाळ वृत्तसेवा
तळेरे, ता. १७ : साळिस्ते जिल्हा परिषद पूर्ण प्राथमिक शाळा क्र. १ चा रानभाजी प्रदर्शन व विक्री उपक्रम विद्यार्थ्यांच्या उत्स्फूर्त प्रतिसादामध्ये झाला. त्यातून मुलांना प्रत्यक्ष ‘कमवा व शिका’चा अनुभव मिळाला. रानभाजी जंगलातून शोधून आणणे आणि प्रदर्शन भरवणे या नेहमीच्या उपक्रमाला छेद देत त्याला आर्थिक बळ देण्यात आले. त्यामुळे काहीतरी वेगळे कमावल्याचे समाधान मुलांच्या चेहऱ्यावर दिसत होते.
हे रानभाजी प्रदर्शन आणि विक्री मंगळवारी (ता. १५) तळेरे आठवडी बाजार येथे भरविण्यात आले होते. शाळेच्या विद्यार्थ्यांनी टाकला, आकुर्ली, भारंगी, शेवगा, कुरडुई, घोट्याच्या वेलीचे तुरे, दुधुर्ली, काटला, हटोळी, शेवगा पाला, जंगली अळू, आंबाडा या रानभाज्या जमवल्या. भाजीच्या जुड्या बांधल्या. तळेरे आठवडी बाजाराचे औचित्य साधून शिक्षक व विद्यार्थ्यांनी भाजीपाला स्टॉल उभारला. एक ध्वनिफीत रेकॉर्ड करून त्याद्वारे ग्राहकांना खरेदीचे आवाहन करण्यात आले. ‘ताई, माई, अक्का, या या, कोणतीही रानभाजी घ्या घ्या’, ‘फक्त दहा रुपये, दहा रुपये’ हा ध्वनीक्षेपक ऐकून गिऱ्हाईकांनी आतुरतेने स्टॉलकडे येऊन ताजी रानभाजी खरेदी केली.
या उपक्रमामुळे विद्यार्थ्यांना खरेदी-विक्री व्यवहार, विक्रीसाठी आवश्यक असलेले वाक्चातुर्य, ग्राहकासोबत सौजन्याने बोलणे, व्यवहारज्ञान रान, भाजीची पौष्टिकता याचा अनुभव मिळाला. केवळ दोन तासांत तब्बल २६९८ रुपयांची कमाई केली. यामागे सर्वच मुलांची मेहनत होती. या मिळालेल्या कमाईतून शैक्षणिक साहित्य खरेदी करायचा मुलांनी निर्धार केला. यासाठी वाहतूक व्यवस्था शाळा व्यवस्थापन समिती अध्यक्ष समीर ताम्हणकर यांनी केली.
या प्रदर्शनासाठी पालक सान्वी ताम्हणकर, रिया चिके, स्वरुपा चिके, विलास रांबाडे, वैदेही रांबाडे, कृपा हरयाण यांनी विशेष मदत केली. रानभाजी प्रदर्शनाचे नियोजन मुख्याध्यापिका संजना ठाकूर, पदवीधर शिक्षक सीताराम पारधिये, संगीता वळवी, माधवी बुचडे यांनी केली. या उपक्रमाचे कौतुक सरपंच प्रभाकर ताम्हणकर, उपसरपंच जितेंद्र गुरव, उपाध्यक्ष गजानन रामाणे, शिक्षणप्रेमी संतोष पाष्टे, चंदूशेठ हरयाण, प्रशांत बारस्कर, पोलिसपाटील गोपाळ चव्हाण, विस्तार अधिकारी रामचंद्र नारकर यांनी केले.