जुन्या आराखड्याप्रमाणेच मतदारसंघ निश्चित

जुन्या आराखड्याप्रमाणेच मतदारसंघ निश्चित
सावंतवाडी प्रारूप आराखडा; इच्छुकांकडून सुटकेचा निःश्वास
सकाळ वृत्तसेवा
सावंतवाडी, ता. १७ ः आगामी जिल्हा परिषद पंचायत समिती निवडणुकीसाठी जाहीर केलेल्या प्रारूप आराखड्यामध्ये तालुक्यातील जिल्हा परिषद मतदारसंघात कुठल्याही प्रकारचे फेरबदल केले नसून जुन्या आराखड्याप्रमाणेच मतदारसंघ निश्चित केल्याने इच्छुक उमेदवारांनी सुटकेचा निःश्वास टाकत मतदारसंघात मतदारांची चाचपणी सुरू केली आहे.
जिल्हा परिषद, पंचायत समिती निवडणुका दिवाळीनंतर होऊ घातल्या आहे. या पार्श्वभूमीवर जिल्ह्यातील मतदारसंघांचा प्रारूप आराखडा जाहीर करण्यात आला. सावंतवाडी तालुक्याचा विचार करता एकूण नऊ जिल्हा परिषद मतदानसंघ आहेत. प्रत्येक मतदारसंघात दोन पंचायत समिती मतदारसंघ पकडून एकूण १६ जागा आहेत. जिल्ह्यातील मतदारसंघांमध्ये फेरबदल होणार असून, मतदारसंघाची रचना बदलणार असल्याचे राजकीय वर्तुळातून बोलले जात होते. मतदारसंघाची रचना बदलल्यास इच्छुक उमेदवारांना मतांची गोळा-बेरीज करताना काहीशी अवघड परिस्थिती निर्माण होणार असल्याने त्यांच्या मनात तशा प्रकारची भीतीही होती; मात्र नुकताच जिल्हा परिषद पंचायत समितीच्या निवडणुकीसाठी प्रारूप आराखडा जिल्हा प्रशासनाकडून जाहीर करण्यात आला.
प्रत्येक तालुक्याच्या ठिकाणी तहसील कार्यालयाबाहेर हा आराखडा प्रसिद्ध करण्यात आला. सावंतवाडी तालुक्यामध्ये नऊही मतदारसंघांमध्ये कोणत्याही प्रकारचा बदल झाला नसून जुन्या आराखड्याप्रमाणेच मतदारसंघ निश्चित करण्यात आलेला आहे. त्यामुळे मतदारसंघात फेरबदल होणार, या अशी धाकधूक असलेल्या इच्छुकांनी काहीसा सुटकेचा निःश्वास टाकला आहे. शिवाय आगामी गणेश चतुर्थी सण लक्षात घेता पुढील जिल्हा परिषद, पंचायत समिती निवडणुकीच्या दृष्टीने मतदारांच्या गाठीभेटी घेण्याबरोबरच मतदारांना आपलेसे करण्यासाठी काही उपक्रम राबविता येतील का, यासाठी चाचपणीही सुरू केली आहे. कोरोना काळापासून जिल्हा परिषद, पंचायत समितीच्या निवडणुका थांबल्या असल्याने अनेक इच्छुक निवडणुकीची वाट पाहत आहेत. मतदारसंघाचा प्रारूप आराखडा जाहीर झाल्याने ते आता अधिक वेगाने कार्यरत होताना दिसून येणार आहेत.

चौकट
जिल्हा परिषदेचे ९ मतदारसंघ
सावंतवाडी तालुक्यामध्ये माडखोल, आंबोली, कोलगाव, तळवडे, माजगाव, इन्सुली, मळेवाड, आरोंदा, बांदा, असे एकूण नऊ जिल्हा परिषद मतदारसंघ आहेत. प्रत्येक मतदारसंघांमध्ये दोन पंचायत समिती मतदारसंघ मिळून एकूण १८ जागा आहेत.